കുട്ടനാട്: പീഡിപ്പിച്ചെന്ന പ്ലസ്ടു വിദ്യാർത്ഥിനിയുടെ പരാതി വ്യാജമെന്ന് സൂചന. പെൺകുട്ടി ലൈംഗിക പീഡനത്തിന് ഇരയായിട്ടില്ലെന്നാണ് വൈദ്യപരിശോധനാ ഫലം. കഴിഞ്ഞ ദിവസമാണ് അഞ്ചംഗ സംഘം പീഡിപ്പിച്ചെന്ന് പെൺകുട്ടി മാതാപിതാക്കൾക്കൊപ്പം പൊലീസ് സ്‌റ്റേഷനിലെത്തി പരാതി നൽകിയത്. പ്രാഥമിക പരിശോധനയിൽ തന്നെ പരാതി കെട്ടിച്ചമച്ചതാണെന്ന് പൊലീസിനു സംശയമുണ്ടായിരുന്നു.

തിങ്കളാഴ്ച ഉച്ചയ്ക്ക് ഒരു മണിയോടെ സ്‌കൂൾ വിട്ടുമടങ്ങവേ അഞ്ചംഗ സംഘം പീഡിപ്പിച്ചെന്നായിരുന്നു പെൺകുട്ടി രക്ഷാകർത്താക്കളോടു പറഞ്ഞത്. രക്ഷിതാക്കൾ രാമങ്കരി പൊലീസിൽ പരാതിപ്പെട്ടു. പൊലീസ് സംഭവസ്ഥലം പരിശോധിച്ച് സി.സി. ടിവി ദൃശ്യം ശേഖരിക്കുകയും പ്രദേശവാസികളുടെ മൊഴി രേഖപ്പെടുത്തുകയും ചെയ്തു. ഇതൊന്നും കുട്ടിയുടെ മൊഴികളുമായി പൊരുത്തപ്പെട്ടില്ല.

പെൺകുട്ടി നൽകിയ മൊഴികളിലും തുടക്കം മുതൽ വൈരുധ്യമുണ്ടായിരുന്നു. ഇങ്ങനെയൊരു പരാതി ഉയർത്താനുള്ള കാരണം വ്യക്തമായിട്ടില്ല. ഇതെക്കുറിച്ചും അന്വേഷിക്കുമെന്ന് പൊലീസ് പറഞ്ഞു.

 

പ്ലസ്ടു വിദ്യാർത്ഥിനി