അഫ്ഗാൻ ഭരണം താലിബാൻ പിടിച്ചെടുത്തതോടെ വീണ്ടും സ്ത്രീകൾ അടിമകളെപ്പോലെ ആയിരിക്കുകയാണ്. സ്ത്രീകളുടെ വിദ്യാഭ്യാസവും തൊഴിലും സ്വാതന്ത്ര്യവുമൊക്കെ നിഷേധിക്കപ്പെട്ടു. പെൺകുട്ടികളുടെ സെക്കൻഡറി വിദ്യാഭ്യാസം നിർത്തലാക്കി. പേടിച്ചിട്ട് പെൺകുട്ടികൾക്ക് പുറത്തിറങ്ങാനാവാത്ത സാഹചര്യം. പട്ടിണി മൂലം പല കുടുംബങ്ങളും പെൺമക്കളെ നേരത്തേ വിവാഹം കഴിപ്പിക്കുകയാണെന്ന വാർത്തകളും വന്നിരുന്നു. ഇത്തരം വെല്ലുവിളികൾക്കിടയിൽ പെൺകുട്ടികളുടെ വിദ്യാഭ്യാസത്തിനു വേണ്ടി മുന്നിട്ടിറങ്ങിയിയിരിക്കുകയാണ് എയ്ഞ്ചല ഗായുർ എന്ന് അഫ്ഗാൻ വനിത.

വിദ്യാഭ്യാസം നിഷേധിക്കപ്പെട്ട അഫ്ഗാൻ പെൺകുട്ടികൾക്കായി ഓൺലൈൻ പഠന കേന്ദ്രം ഒരുക്കിയിരിക്കുകയാണ് എയ്ഞ്ചല. ഇന്ന് എയ്ഞ്ചലയുടെ ഓൺലൈൻ സ്‌കൂളിൽ ആയിരത്തിൽപ്പരം കുട്ടികളാണ് പഠിക്കുന്നത്. നാനൂറിൽപരം അദ്ധ്യാപകരും എയ്ഞ്ചലയുടെ ഓൺലൈൻ സ്‌കൂളിന് കരുത്തേകുന്നു. കുട്ടിക്കാലത്ത് തനിക്ക് മതിയായ വിദ്യാഭ്യാസം ലഭിക്കാതിരുന്ന സാഹചര്യമാണ് എയ്ഞ്ചലയെ ഇന്ന് ഇരുത്തിചിന്തിപ്പിച്ചതും ഓൺലൈൻ സ്‌കൂൾ തുടങ്ങാൻ പ്രേരണയായതും.

അഫ്ഗാനിലെ പ്രതിസന്ധികൾ നിരന്തരം വാർത്തകളിൽ നിറഞ്ഞതോടെയാണ് കുട്ടികളുടെ വിദ്യാഭ്യാസത്തിനു വേണ്ടി എന്തെങ്കിലും ചെയ്യണമെന്ന് എയ്ഞ്ചല തീരുമാനിച്ചത്. അങ്ങനെയാണ് 'ഓൺലൈൻ ഹെറാത് സ്‌കൂളി'ന് തുടക്കമിടുന്നത്. അഫ്ഗാനിലെ പെൺകുട്ടികൾക്ക് വിദ്യാഭ്യാസം ഉറപ്പാക്കുകയായിരുന്നു ലക്ഷ്യം. പ്രധാന വിഷയങ്ങൾക്ക് പുറമെ പെയിന്റിങ് പോലെയുള്ള കലകളും അദ്ധ്യാപകർ പ്രോത്സാഹിപ്പിക്കുന്നുണ്ട്.

1992ൽ അഫഗാനിസ്ഥാനിൽ അഭ്യന്തരകലഹം നടക്കുന്ന കാലത്ത് എയ്ഞ്ചലയ്ക്ക് എട്ടു വയസ്സു പ്രായമേ ഉള്ളു. ഹെറാത്തിൽ നിന്ന് ഇറാനിലേക്ക് പലായനം ചെയ്യുകയായിരുന്നു എയ്ഞ്ചലയുടെ കുടുംബം. താൽക്കാലിക വിസ ആയിരുന്നതിനാൽ ഏതാണ്ട് അഞ്ചുവർഷത്തോളം എയ്ഞ്ചലയുടെ പഠനം മുടങ്ങി. തുടർന്ന് രേഖകളെല്ലാം ശരിയാക്കിയതിനുശേഷം പതിമൂന്നാം വയസ്സിലാണ് എയ്ഞ്ചല വീണ്ടും സ്‌കൂളിൽ പോയിത്തുടങ്ങിയത്. അന്ന് സ്‌കൂളിൽ നിന്ന് തിരികെയെത്തിയാൽ ഉടൻ അഫ്ഗാനിൽ നിന്നു വന്ന സ്‌കൂളിലേക്ക് പോകാൻ കഴിയാത്ത കുട്ടികളെ പഠിപ്പിക്കലായിരുന്നു എയ്ഞ്ചലയുടെ ജോലി. കാലങ്ങൾക്കുശേഷം താലിബാൻ അഫ്ഗാനിസ്ഥാനിൽ നിന്ന് പിൻവാങ്ങിയതോടെയാണ് എയ്ഞ്ചലയും കുടുംബവും വീണ്ടും നാട്ടിൽ തിരികെയെത്തുന്നത്. തുടർന്ന് സെക്കൻഡറി സ്‌കൂൾ ടീച്ചർ കോഴ്‌സ് പൂർത്തിയാക്കിയ എയ്ഞ്ചല ഇന്ന് യു.കെയിലാണ് സ്ഥിരതാമസം.

താൻ അനുഭവിച്ച വേദനകൾക്കും അവഗണനകൾക്കുമെല്ലാമുള്ള മറുപടിയാണ് ഈ ഓൺലൈൻ സ്‌കൂൾ എന്നാണ് എയ്ഞ്ചല പറയുന്നത്. തോക്കിനു പകരം പേന എന്ന സന്ദേശം പടർത്തുകയാണ് എയ്ഞ്ചലയുടെ ലക്ഷ്യം.

 

വനിത