സ്‌നേഹവീടിന് വെൽഫെയർ പാർട്ടിയുടെ സഹായം വി.ഡി സതീശന് കൈമാറി
കൊടിയത്തൂർ: കൊടിയത്തൂർ ഗ്രാമ പഞ്ചായത്ത് അംഗം ശിഹാബ് മാട്ടുമുറിയുടെ നേതൃത്വത്തിൽ ജനകീയ കൂട്ടായ്മയോടെ മാട്ടുമുറിയിൽ നിർമ്മിക്കുന്ന സ്‌നേഹവീടിന് വെൽഫെയർ പാർട്ടിയുടെ സഹായഹസ്തം. സ്‌നേഹവീട് നിർമ്മാണത്തിന് പ്രവർത്തകരിൽ നിന്ന് സമാഹരിച്ച തുകയുടെ ആദ്യ ഗഡു പ്രതിപക്ഷ നേതാവ് വി.ഡി സതീശന് വെൽഫെയർ പാർട്ടി ജില്ലാ പ്രസിഡന്റ് അസ്ലം ചെറുവാടി, പഞ്ചായത്ത് കമ്മിറ്റി പ്രസിഡന്റ് ജ്യോതിബസു, സെക്രട്ടറി കെ.ടി ഹമീദ് എന്നിവർ ചേർന്ന് കൈമാറി. സാധാരണക്കാരായ മനുഷ്യരുടെ സങ്കടങ്ങളും പ്രയാസങ്ങളും മനസ്സിലാക്കി അത് പരിഹരിക്കലാണ് യഥാർത്ഥ രാഷ്ട്രീയ പ്രവർത്തനമെന്ന് പ്രതിപക്ഷ നേതാവ് വി.ഡി സതീശൻ അഭിപ്രായപ്പെട്ടു.
കൊടിപിടിച്ച് നടക്കലോ സമരം ചെയ്യലോ മാത്രമല്ല രാഷ്ട്രീയം. വെൽഫെയർ പാർട്ടിയുടെ ഈ സഹായം സ്‌നേഹവീടിന് വലിയ പ്രോത്സാഹനമാണെന്നും അദ്ദേഹം അഭിപ്രായപ്പെട്ടു. കഴിഞ്ഞ ഹർത്താൽ ദിനത്തിൽ കനത്ത മഴ വകവെക്കാതെ സ്‌നേഹവീട് നിർമ്മാണത്തിന് ടീം വെൽഫെയർ പ്രവർത്തകർ സന്നദ്ധസേവനം ചെയ്തത് മാതൃകയായിരുന്നു.
ഗ്രാമ പഞ്ചായത്ത് പ്രസിഡന്റ് ശംലൂലത്ത് അധ്യക്ഷത വഹിച്ച ചടങ്ങിൽ സി.പി ചെറിയ മുഹമ്മദ്, ഗ്രാമ പഞ്ചായത്ത് അംഗങ്ങളായ രിഹ്ല മദീജ്, ടി.കെ അബൂബക്കർ, കെ.ടി മൻസൂർ, അശ്റഫ് കൊളക്കാടൻ എന്നിവർ സംസാരിച്ചു. ശിഹാബ് മാട്ടുമുറി സ്വാഗതവും പുതിയോട്ടിൽ ബശീർ നന്ദിയും പറഞ്ഞു.
