'ആ ഗംഭീര സർപ്രപൈസിന്റെ പൂട്ട് തുറക്കാനുള്ള സമയമായി; ഞങ്ങളുടെ സന്തോഷം അടക്കാനാവുന്നില്ല'; 'മരക്കാർ' തിയറ്റർ റിലീസിലെ ആഹ്‌ളാദം പങ്കുവച്ച് മോഹൻലാൽ
തിരുവനന്തപുരം: 'മരക്കാർ' തിയറ്ററുകളിൽത്തന്നെ റിലീസ് ചെയ്യാനുള്ള തീരുമാനത്തിലെ ആഹ്‌ളാദം പങ്കുവച്ച് മോഹൻലാൽ. മന്ത്രി സജി ചെറിയാൻ ആണ് ആദ്യമായി മാധ്യമങ്ങളോട് റിലീസ് തീയതി പ്രഖ്യാപിച്ചത്. ഡിസംബർ 2നാണ് ലോകമാനമുള്ള തിയറ്ററുകളിൽ ചിത്രം എത്തുക.
'ആ ഗംഭീര സർപ്രപൈസിന്റെ പൂട്ട് തുറക്കാനുള്ള സമയമായി. ഞങ്ങളുടെ സന്തോഷം അടക്കാനാവുന്നില്ല. മനോഹരമായ ദൃശ്യവിസ്മയം അതിന്റെ എല്ലാ ചാരുതയോടും, അത് എവിടേക്കുവേണ്ടിയാണോ നിർമ്മിക്കപ്പെട്ടത്, അവിടെത്തന്നെ ആസ്വദിക്കാൻ പോവുകയാണ് നിങ്ങൾ'. മരക്കാറിന്റെ ആഗോള തിയറ്റർ റിലീസ് തീയതി പങ്കുവച്ചുകൊണ്ട് അദ്ദേഹം സാമൂഹ്യ മാധ്യമത്തിൽ കുറിച്ചു.
ചിത്രം ഒടിടി റിലീസ് ആയിരിക്കുമെന്ന ആന്റണി പെരുമ്പാവൂരിന്റെ പ്രഖ്യാപനം വന്നതിനു ശേഷം കഴിഞ്ഞ ഒരാഴ്ചയായി നടന്ന ചർച്ചകളിലാണ് ചിത്രം തിയറ്റർ റിലീസ് ആണെന്നുള്ള തീരുമാനം പുറത്തുവന്നത്.
സിനിമ പുറത്തിറങ്ങുന്ന സമയമാവുമ്പോഴേക്ക് തിയറ്ററുകളിൽ 75 ശതമാനം സീറ്റുകളിലേക്ക് കാണികളെ പ്രവേശിപ്പിക്കാൻ ധാരണയായിട്ടുണ്ടെന്നും അറിയുന്നു. സിനിമാ രംഗത്തെ എല്ലാ സംഘടനകളെയും ഒരുമിച്ച് നിർത്തി നടത്തിയ ചർച്ചകൾക്കൊടുവിലാണ് മരക്കാറിന്റെ തിയറ്റർ റിലീസ് യാഥാർഥ്യമാവുന്നത്. സംസ്ഥാന സർക്കാരിനും മരക്കാർ തിയറ്ററുകളിൽ റിലീസ് ചെയ്യാനായിരുന്നു താൽപര്യം.
എട്ടാം തീയതി ചെന്നൈയിൽ നടന്ന, ചിത്രത്തിന്റെ ആദ്യ സ്വകാര്യ പ്രദർശനത്തിൽ മോഹൻലാൽ അടക്കമുള്ളവർ ചിത്രം കണ്ടിരുന്നു. ഇതിനുശേഷം തിയറ്റർ റിലീസ് എന്ന അഭിപ്രായത്തിലേക്ക് മോഹൻലാലും അന്തിമമായി എത്തിയെന്നാണ് വിവരം. ഒടിടി റിലീസ് എന്ന് പ്രഖ്യാപിച്ചിരുന്നെങ്കിലും ഔദ്യോഗിക റിലീസ് തീയതിയോ ഏത് പ്ലാറ്റ്‌ഫോം എന്നതോ ഇതുവരെ പ്രഖ്യാപിച്ചിരുന്നില്ല.
എന്നാൽ ചിത്രം ആമസോൺ പ്രൈം വീഡിയോയിലൂടെയാണ് എത്തുകയെന്ന് റിപ്പോർട്ടുകൾ ഉണ്ടായിരുന്നു. ഇനി തിയറ്റർ റിലീസിനു പിന്നാലെയാവും ചിത്രം ഒടിടിയിൽ എത്തുക. ഇത് എത്ര ദിവസത്തിനു ശേഷമായിരിക്കും എന്ന കാര്യത്തിൽ തീരുമാനം ആയിട്ടില്ലെന്നാണ് അറിയുന്നത്.
