സുഹൃത്തിനൊപ്പം ജീവിക്കാൻ കുഞ്ഞിനെ ഉപേക്ഷിച്ചതെന്ന് മൊഴി; പാർക്കിൽ ഉപേക്ഷിക്കപ്പെട്ട നിലയിൽ കണ്ടെത്തിയ നാലു വയസ്സുകാരന്റെ അമ്മയെ കണ്ടെത്തി പൊലീസ്: കുഞ്ഞിനെ ഉപേക്ഷിച്ച അസം സ്വദേശിനിയെ ജയിലിൽ അടച്ച് കോടതി

തോപ്പുംപടി: ദിവസങ്ങൾ നീണ്ട തിരച്ചിലിനൊടുവിൽ നാലു വയസ്സുകാരൻ രാഹുലിന്റെ അമ്മയെ കണ്ടെത്തി പൊലീസ്. അസം സ്വദേശിനിയായ പ്രിയങ്ക ബോറയാണ് കുഞ്ഞിനെ ഉപേക്ഷിച്ചത്. 21 വയസ്സുകാരിയായ ഇവർ സുഹൃത്തിനൊപ്പം ജീവിക്കാനാണ് കുഞ്ഞിനെ ഉപേക്ഷിച്ചതെന്ന് പൊലീസിന് മൊഴി നൽകി. കുട്ടിയെ സംബന്ധിച്ചു വന്ന പത്രവാർത്തയാണ് അമ്മയെ കണ്ടെത്താൻ സഹായിച്ചത്. അതേസമയം കുട്ടിയെ കാണണമെന്ന ആഗ്രഹം പോലും ഈ അമ്മ പ്രകടിപ്പിച്ചില്ല. കോടതിയിൽ ഹാജരാക്കിയ ഇവരെ റിമാൻഡ് ചയ്തു.

മൂവാറ്റുപുഴയിൽ ഒരു ഭക്ഷ്യസംസ്‌കരണ കേന്ദ്രത്തിലാണ് പ്രിയങ്ക ജോലി ചെയ്യുന്നത്. ഒപ്പം ജോലി ചെയ്യുന്ന സുഹൃത്ത് രൂപ് ജ്യോതിക്കൊപ്പം ജീവിക്കാനാണ് ഇവർ കുഞ്ഞിനെ ഉപേക്ഷിച്ചത്. കുട്ടിയെ നാട്ടിലേക്ക് അയയ്ക്കാനെന്നു പറഞ്ഞ് സ്ഥാപന ഉടമയിൽനിന്ന് 3000 രൂപ കടം വാങ്ങിയാണ് ഇവർ കുഞ്ഞുമായി ഫോർട്ട്കൊച്ചിയിൽ പോയതും കുഞ്ഞിനെ പാർക്കിൽ ഉപേക്ഷിച്ചതും. കുട്ടിയെ ഉപേക്ഷിച്ച ശേഷം ഇവർ മൂവാറ്റുപുഴയിലേക്ക് മടങ്ങി. കുട്ടിയെ പരിചയക്കാരനൊപ്പം നാട്ടിലേക്ക് അയച്ചുവെന്നാണ് ഇവർ സ്ഥാപനയുടമയോട് പറഞ്ഞത്.

കുട്ടിയെ ഉപേക്ഷിക്കപ്പെട്ട നിലയിൽ കണ്ടെത്തിയ വാർത്ത കണ്ടപ്പോൾ സ്ഥാപനമുടമയ്ക്ക് സംശയം തോന്നി. തുടർന്ന് ഇയാൾ പൊലീസുമായി ബന്ധപ്പെടുകയും സ്ത്രീയെയും സുഹൃത്തിനെയും കൂട്ടി ഇയാൾ മൂവാറ്റുപുഴ പൊലീസ് സ്റ്റേഷനിലെത്തുകയും ചെയ്തു. കോവിഡ് വാക്സിൻ എടുക്കാനെന്നു പറഞ്ഞാണ് ഇവരെ കൊണ്ടുപോയത്. മൂവാറ്റുപുഴ സ്റ്റേഷനിൽനിന്ന് നിർദേശിച്ചതനുസരിച്ച് സ്ഥാപന ഉടമ ഇവരെ ഫോർട്ട്കൊച്ചി സ്റ്റേഷനിലേക്ക് കൊണ്ടുവന്നു.

പൊലീസ് ചോദ്യം ചെയ്തപ്പോൾ പ്രിയങ്ക കാര്യങ്ങൾ വെളിപ്പെടുത്തി. കുട്ടിയുടെ അച്ഛൻ മറ്റൊരു സ്ത്രീയെ വിവാഹം കഴിച്ചതിനെ തുടർന്ന് താൻ കുട്ടിയുമായി സുഹൃത്തിനൊപ്പം നാടുവിടുകയായിരുന്നു എന്നാണ് പ്രിയങ്ക പറയുന്നത്. പലയിടത്തായി ജോലി ചെയ്തു. ഒടുവിൽ മൂവാറ്റുപുഴയിലെത്തി. ഒന്നിച്ചുള്ള ജീവിതത്തിന് കുഞ്ഞ് തടസ്സമാണെന്ന് കണ്ടെപ്പോൾ ഉപേക്ഷിക്കാൻ തീരുമാനിച്ച്.

കുട്ടിയോട് ക്രൂരത കാട്ടിയതിന് അമ്മയ്‌ക്കെതിരേയും പ്രേരണാ കുറ്റത്തിന് രൂപ് ജ്യോതിക്കെതിരേയും ഫോർട്ട്കൊച്ചി പൊലീസ് കേസെടുത്തു. ഇരുവരെയും കോടതി റിമാൻഡ് ചെയ്തു. കുട്ടിയെ തിരികെ വേണമെന്ന് ഇവർ ആവശ്യപ്പെട്ടിട്ടില്ലെന്ന് കേസ് അന്വേഷിക്കുന്ന മട്ടാഞ്ചേരി അസി. പൊലീസ് കമ്മിഷണർ വി.ജി. രവീന്ദ്രനാഥ് പറഞ്ഞു. കഴിഞ്ഞ വെള്ളിയാഴ്ചയാണ് കുട്ടിയെ ഫോർട്ട്കൊച്ചിയിലെ പാർക്കിൽ കണ്ടെത്തിയത്. ഒറ്റയ്ക്കിരിക്കുകയായിരുന്ന കുട്ടിയെ സംശയം തോന്നി നാട്ടുകാരിൽ ചിലർ സ്റ്റേഷനിൽ എത്തിക്കുകയായിരുന്നു. പൊലീസ് കുട്ടിയെ ചൈൽഡ് വെൽഫെയർ കമ്മിറ്റിക്ക് കൈമാറി. കുട്ടി ശിശുക്ഷേമ സമിതിയുടെ സംരക്ഷണയിലാണ്.