കെ-റെയിൽ കേരളത്തെ വിഭജിക്കുന്ന ചൈനാ മതിലാകും; പദ്ധതി സംസ്ഥാന താൽപര്യത്തിന് വിരുദ്ധമാണെന്നും ബിജെപി നേതാവ് ഇ.ശ്രീധരൻ

കൊല്ലം: കെ-റെയിലിനെതിരെ ബിജെപി നേതാവ് ഇ. ശ്രീധരൻ. പദ്ധതി സംസ്ഥാന താൽപര്യത്തിന് വിരുദ്ധമാണെന്ന് അദ്ദേഹം പറഞ്ഞു. സിൽവർ ലൈനിന്റെ ഇപ്പോഴത്തെ അലൈന്മെന്റ് അനുസരിച്ച് കെ- റെയിൽ നിർമ്മാണം നടന്നാൽ കേരളത്തെ വിഭജിക്കുന്ന 'ചൈനാ മതിൽ' രൂപപ്പെടുമെന്നും അദ്ദേഹം അവകാശപ്പെട്ടു.

'രാത്രിയിൽ ചരക്കുഗതാഗതം നടത്തുമെന്ന കെ- റെയിൽ പ്രഖ്യാപനം അപ്രായോഗികമാണ്. 2025 ൽ പദ്ധതി പൂർത്തിയാക്കാമെന്ന കെ- റെയിൽ വാദവും തെറ്റാണ്. കെ.ആർ.ഡി.സി.എല്ലിന് നിർമ്മാണ ചുമതല നൽകിയ 27 റെയിൽവേ മേൽപാലങ്ങളിൽ ഒന്നിന്റെ നിർമ്മാണം പോലും തുടങ്ങാനായിട്ടില്ല,' അദ്ദേഹം പറഞ്ഞു.

കോഴിക്കോട്, തിരുവനന്തപുരം ലൈറ്റ് മെട്രോ പദ്ധതികൾ നിർത്താൻ കാരണം സർക്കാരാണെന്നും അദ്ദേഹം കുറ്റപ്പെടുത്തി.