മുല്ലപ്പെരിയാർ ജലനിരപ്പ് 152 അടിയായി ഉയർത്തും; അണക്കെട്ട് ബലപ്പെടുത്തിയ ശേഷം നടപടി എന്ന് തമിഴ്‌നാട് മന്ത്രി ദുരൈ മുരുകൻ

ചെന്നൈ: മുല്ലപ്പെരിയാർ ജലനിരപ്പ് 152 അടിയായി ഉയർത്തുമെന്ന് തമിഴ്‌നാട് മന്ത്രി ദുരൈ മുരുകൻ. സുപ്രീം കോടതി നിർദേശപ്രകാരം അണക്കെട്ട് ബലപ്പെടുത്തിയ ശേഷം ജലനിരപ്പ് ഉയർത്തുമെന്ന് ജലവിഭവ വകുപ്പ് മന്ത്രിയായ ദുരൈ മുരുകൻ പറഞ്ഞു.

സുപ്രീം കോടതി മാർഗനിർദേശങ്ങൾ പാലിച്ചാകും ജലനിരപ്പ് ഉയർത്തുക. അതിന് മുമ്പ് അണക്കെട്ടിന്റെ ബലപ്പെടുത്തൽ ജോലികൾ പൂർത്തിയാക്കും. മുഖ്യമന്ത്രി എം.കെ സ്റ്റാലിനുമായി ഇത് സംബന്ധിച്ച് കൂടിയാലോചന നടത്തുമെന്നും അദ്ദേഹം പറഞ്ഞു. മുല്ലപ്പെരിയാർ 152 അടിയാക്കുമെന്ന് മുൻപും ദുരൈ മുരുകൻ പറഞ്ഞിരുന്നു.