കണ്ണൂർ: ജീവിക്കാൻ തൊഴിലിനുവേണ്ടി ഭരണകൂടത്തോട് യാചിക്കുന്ന അവസ്ഥയാണ് രാജ്യത്തെ യുവാക്കൾക്ക് ഉണ്ടായിരിക്കുന്നതെന്ന് സിപിഐ സംസ്ഥാന സെക്രട്ടറി കാനം രാജേന്ദ്രൻ. ഈ വ്യവസ്ഥിതി മാറ്റിയെടുക്കാൻ പോരാട്ടങ്ങളിലൂടെ ആർജ്ജിക്കുന്ന ശക്തി കൊണ്ടുമാത്രമെ സാധിക്കൂ എന്ന് മനസിലാക്കിക്കൊണ്ട് യുവതലമുറയെ പോരാട്ടങ്ങളിലേക്ക് നയിക്കാൻ എഐവൈഎഫ് മുൻകയ്യെടുക്കണമെന്നും അദ്ദേഹം പറഞ്ഞു. കണ്ണൂരിൽ എഐവൈഎഫ് സംസ്ഥാന സമ്മേളനത്തിന്റെ ഭാഗമായി പ്രദീപ് പുതുക്കുടി നഗറിൽ നടന്ന പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

ഏത് സ്വേച്ഛാധിപതിയെയും ജനകീയ പ്രക്ഷോഭത്തിന്റെ മുന്നിൽ മുട്ടുകുത്തിക്കാമെന്നതിന്റെ ഉദാഹരണമാണ് കർഷകസമരം. ഇത്തരത്തിൽ പ്രവർത്തിക്കാൻ കഴിയുന്ന ജനാധിപത്യ പ്രസ്ഥാനങ്ങളെ ശക്തിപ്പെടുത്തുകയാണ് ഇന്നിന്റെ ആവശ്യം. സ്വാതന്ത്ര്യത്തിനുശേഷം, ഭരണസംവിധാനങ്ങളോട് കലഹിക്കാനും അവകാശങ്ങൾ ചോദിച്ചുവാങ്ങാനും യുവാക്കൾക്ക് നേതൃത്വം നൽകിയ പ്രസ്ഥാനമാണ് എഐവൈഎഫ്. തൊഴിൽ അല്ലെങ്കിൽ ജയിൽ, 18 വയസിലെ വോട്ടവകാശം തുടങ്ങിയ വിഷയങ്ങൾ പൊതുസമൂഹത്തിന് മുന്നിൽ അവതരിപ്പിക്കുകയും ചർച്ച ചെയ്യുകയും ചെയ്തത് എഐവൈഎഫ് ആണ്.

ഇത്തരം നിരവധി ആവശ്യങ്ങൾ സമരങ്ങളിലൂടെയും മറ്റും നേടിയെടുത്ത ചരിത്രമാണ് ഇന്ത്യൻ യുവത്വത്തിന് ഉണ്ടായിരുന്നത്. ഇന്ന് വളരെ വ്യത്യസ്തമായ സാഹചര്യമാണ് രാജ്യത്ത് നിലനിൽക്കുന്നത്. ബ്രിട്ടീഷുകാർ ചെയ്തതുപോലെ ജനങ്ങളെ ഭിന്നിപ്പിക്കാനും പല തട്ടുകളിലാക്കാനും ഭരണാധികാരികൾ ശ്രമിക്കുന്നതാണ് ഇന്ന് നാം കാണുന്നത്. ഭരണകൂടത്തിന്റെ നയങ്ങളിൽ ഏറ്റവുമധികം ദുരിതമനുഭവിക്കുന്നത് യുവാക്കളാണ്. ആരുടെ കൂടെയാണ് ഭരണകൂടം എന്ന ചോദ്യത്തിന്, മൂലധന ശക്തികളുടെയും കോർപറേറ്റുകളുടെയും കൂടെയാണെന്ന് തെളിയിച്ചുകൊണ്ടിരിക്കുകയാണ്.

നാടിന്റെ കരുത്ത് മതനിരപേക്ഷതയാണ്. അവ ഇന്ന് ചോദ്യം ചെയ്യപ്പെടുകയാണ്. മതനിരപേക്ഷ രാഷ്ട്രത്തിന് പകരം മതരാഷ്ട്രമാണ് ഉയർത്തിക്കൊണ്ടുവരുന്നത്. ഇപ്പോൾ കേരള സമൂഹത്തിൽ പോലും ജാതി മത ചിന്തകൾ കത്തിപ്പടരുന്നത് എത്ര വേഗത്തിലാണെന്ന് നമുക്ക് കാണാൻ സാധിക്കും. രാഷ്ട്രീയത്തിൽ നിന്ന് മതത്തെ അകറ്റി നിർത്തുന്ന ഒരു സമൂഹം കെട്ടിപ്പടുക്കേണ്ടതുണ്ട്.
കോവിഡ് മഹാമാരിക്കാലത്ത് കേരളത്തിലെ ഇടതുപക്ഷ സർക്കാർ പരമാവധി ജനങ്ങളോടൊപ്പം നിന്നുകൊണ്ട് അവരെ സഹായിക്കാൻ ശ്രമിച്ചിട്ടുണ്ട്. എന്നാൽ സർക്കാരിന് മാത്രം ചെയ്യാൻ കഴിയുന്ന കാര്യങ്ങൾക്ക് പരിമിതിയുണ്ട്. ആ സാഹചര്യത്തിൽ എഐവൈഎഫ് കേരളത്തിൽ അങ്ങോളമിങ്ങോളം സംഘടിപ്പിച്ച പ്രവർത്തനങ്ങൾ ശ്രദ്ധേയമാണ്. മഹാമാരിക്കാലത്ത് മനുഷ്യനോടൊപ്പം നിൽക്കാനും അവർക്ക് സഹായമെത്തിക്കാനും നടത്തിയ പ്രവർത്തനങ്ങളിലൂടെ സർക്കാരിന് പിന്തുണ നൽകാൻ എഐവൈഎഫിന് കഴിഞ്ഞുവെന്നത് അഭിമാനകരമാണ്. ഇതോടൊപ്പം നീതിക്കുവേണ്ടിയുള്ള പോരാട്ടങ്ങളിലും അഴിമതിക്കെതിരെയുള്ള സമരങ്ങളിലുമെല്ലാം ശക്തമായി മുന്നോട്ടുപോകാൻ യുവജന പ്രസ്ഥാനത്തിന് കഴിയണമെന്നും കാനം പറഞ്ഞു.