കടൽമാർഗം ഒമാനിലേക്ക് മയക്കുമരുന്ന് കടത്താൻ ശ്രമിച്ച രണ്ട് പ്രവാസികൾ പിടിയിൽ

മസ്‌കത്ത്: കടൽമാർഗം ഒമാനിലേക്ക് മയക്കുമരുന്ന് കടത്താൻ ശ്രമിക്കുകയായിരുന്ന രണ്ട് പ്രവാസികൾ പൊലീസിന്റെ പിടിയിൽ. തെക്കൻ ബാത്തിന ഗവർണറേറ്റിന്റെ പുറംകടലിൽ എത്തിയ ഒരു ബോട്ടിൽ മയക്കുമരുന്ന് കടത്താനായിരുന്നു ശ്രമം. പിടിയിലായ രണ്ട് പേരും രാജ്യത്തേക്ക് അനധികൃതമായി പ്രവേശിച്ചവരുമാണെന്ന് റോയൽ ഒമാൻ പൊലീസ് അറിയിച്ചു.

കടൽമാർഗം അനധികൃതമായി രാജ്യത്തേക്ക് കടക്കാൻ ശ്രമിക്കുന്നതിനിടയിലാണ് ഇവർ പൊലീസിന്റെ പിടിയിൽ അകപ്പെട്ടതെന്ന് റോയൽ ഒമാൻ പൊലീസ് പുറത്തിറക്കിയ പ്രസ്താവനയിൽ പറയുന്നു. ഇവർ സഞ്ചരിച്ചിരുന്ന ബോട്ടിൽ നിന്ന് 60 കിലോഗ്രാം ക്രിസ്റ്റൽ മയക്കുമരുന്ന് പൊലീസ് പിടിച്ചെടുത്തു. പിടിയിലായവർക്കെതിരായ നിയമനടപടികൾ പൂർത്തീകരിച്ചു കഴിഞ്ഞുവെന്ന് റോയൽ ഒമാൻ പൊലീസ് പ്രസ്താവനയിൽ വ്യക്തമാക്കി.