രജനീകാന്തിനെ വീട്ടിലെത്തി സന്ദർശിച്ച് വി.കെ ശശികല

ചെന്നൈ: രജനികാന്തിനെ വീട്ടിലെത്തി സന്ദർശിച്ച് വി.കെ ശശികല. അടുത്തിടെ ആശുപത്രിയിൽ ശസ്ത്രക്രിയക്ക് വിധേയനായ രജനികാന്തിന്റെ ആരോഗ്യനില നേരിട്ടെത്തി അന്വേഷിക്കുന്നതിനാണ് ശശികല എത്തിയത്. തമിഴ്‌നാട് രാഷ്ട്രീയത്തിൽ പുതിയ ചർച്ചയക്ക് വഴിയൊരുക്കിയിരിക്കുകയാണ് വി.കെ ശശികല- രജനീകാന്ത് കൂടിക്കാഴ്ച.

ദാദാ സാഹിബ് ഫാൽക്കെ അവാർഡ് നേട്ടത്തിൽ സൂപ്പർതാരത്തെ ശശികല അഭിനന്ദിച്ചുവെന്നും എ.ഡി.എം.കെ പുറത്തിറക്കിയ വാർത്താക്കുറിപ്പിൽ പറയുന്നു. രജനിയും ഭാര്യ ലത രജനീകാന്തും ചേർന്നാണ് ശശികലയെ സ്വീകരിച്ചത്.

'അണ്ണാത്തേ'ക്ക് ശേഷം അടുത്ത വർഷം പുറത്തിറക്കാനുദ്ദേശിക്കുന്ന ഏതാനും ചിത്രങ്ങളുടെ തിരക്കഥ കേൾക്കുകയാണ് ആശുപത്രിവാസത്തിനും വിശ്രമത്തിനും ശേഷം രജനീകാന്ത്. ശശികലയുടെ സന്ദർശനവേളയിൽ എടുത്ത ചിത്രങ്ങൾ സോഷ്യൽ മീഡിയയിൽ വൈറലായിക്കഴിഞ്ഞു.