വീടിനുള്ളിൽ പ്രസവിച്ചു; കുഞ്ഞിന്റെ കരച്ചിൽ കേട്ടുവന്ന അയൽവാസിയോട് പറഞ്ഞത് കോവിഡ് ആണെന്ന്; ആരോഗ്യവകുപ്പ് ഉദ്യോഗസ്ഥർ എത്തിയപ്പോൾ നവജാത ശിശുവിന്റെ മൃതദേഹം ബക്കറ്റിൽ; കേസെടുത്തു

കാഞ്ഞിരപ്പള്ളി: നവജാത ശിശുവിന്റെ മൃതദേഹം വീടിനുള്ളിൽ ബക്കറ്റിൽ കണ്ടെത്തി. ഇടക്കുന്നം മുക്കാലിയിൽ വാടകയ്ക്ക് താമസിക്കുന്ന സുരേഷ്-നിഷ ദമ്പതികളുടെ നാലുദിവസം മാത്രം പ്രായമുള്ള ആൺ കുഞ്ഞിന്റെ മൃതദേഹമാണ് ആരോഗ്യവകുപ്പ് ഉദ്യോഗസ്ഥർ നടത്തിയ പരിശോധനയിൽ കണ്ടെത്തിയത്. ശുചിമുറിയിലെ ബക്കറ്റിലാണ് കുട്ടിയുടെ മൃതദേഹം കണ്ടെത്തിയത്.

സംഭവ സമയത്ത് അമ്മയായ നിഷയും മറ്റു മക്കളും മാത്രമാണ് വീട്ടിലുണ്ടായിരുന്നത്. പെയിന്റിങ് തൊഴിലാളിയായ ഭർത്താവ് സുരേഷ് ജോലിക്കു പോയിരുന്നു. കുഞ്ഞ് ജനിച്ച വിവരം അയൽവാസികൾ അറിഞ്ഞിരുന്നില്ല. കുഞ്ഞിന്റെ കരച്ചിൽ കേട്ട് അയൽവാസിയായ സ്ത്രീ എത്തിയപ്പോൾ എല്ലാവർക്കും കോവിഡ് ആണെന്ന് പറഞ്ഞ് തിരിച്ചയച്ചു.

സംശയം തോന്നിയ ഇവർ ആശാ വർക്കറെ വിവരം അറിയിച്ചു. ആശാ വർക്കർ ആരോഗ്യവകുപ്പ് ഉദ്യോഗസ്ഥരുമായി വീട്ടിലെത്തിയപ്പോഴാണ് പ്രസവം നടന്നതിന്റെ ലക്ഷണങ്ങൾ കണ്ടെത്തിയത്. തുടർന്ന് നടത്തിയ തെരച്ചിലിൽ കുഞ്ഞിന്റെ മൃതദേഹം കണ്ടെത്തുകയായിരുന്നു.

നിർത്താതെ കരഞ്ഞതിനെ തുടർന്ന് കുഞ്ഞിന് അനക്കമില്ലാതെ വന്നപ്പോൾ, കുഞ്ഞിനെ മറവുചെയ്യാനായി ബക്കറ്റിലിട്ടു വയ്ക്കാൻ മൂത്ത മകളോട് പറയുകയായിരുന്നു എന്ന് നിഷ പൊലീസിനോട് പറഞ്ഞു. സംഭവത്തിൽ അസ്വാഭാവിക മരണത്തിന് പൊലീസ് കേസെടുത്തു. നിഷയെ ആശുപത്രിയിൽ പ്രവേശിപ്പിച്ചു.

മരിച്ച കുട്ടിയെക്കൂടാതെ ഇവർക്ക് അഞ്ച് മക്കൾകൂടിയുണ്ട്. 15 വയസ്സും അഞ്ചു വയസ്സും മൂന്നു വയസ്സുള്ള മൂന്നു പെൺമക്കളും ഒമ്പത്, ഒന്നര വയസ്സുള്ള രണ്ട് ആൺകുട്ടികളുമാണ് ഇവർക്ക് ഉള്ളത്. ജന്മനാ കാലിന് സ്വാധീനക്കുറവുള്ള നിഷയെ വീടിന് പുറത്ത് അധികം കാണാറില്ലെന്ന് നാട്ടുകാർ പറയുന്നു.