വിജയ് ദിവസ് ആഘോഷത്തിൽ ഇന്ദിരാ ഗാന്ധിയെ സർക്കാർ മറന്നു; കേന്ദ്ര സർക്കാർ നടപടി സ്ത്രീവിരുദ്ധമെന്ന വിമർശനവുമായി പ്രിയങ്ക
ന്യൂഡൽഹി: 1971ൽ പാക്കിസ്ഥാനെതിരായ ഇന്ത്യയുടെ യുദ്ധ വിജയം അനുസ്മരിക്കാനായി ഡൽഹിയിൽ നടന്ന ചടങ്ങിൽ മുൻ പ്രധാനമന്ത്രി ഇന്ദിരാഗാന്ധിയെ അവഗണിച്ചതായി കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി ആരോപിച്ചു. കേന്ദ്ര സർക്കാർ നടപടിയെ സ്ത്രീവിരുദ്ധം എന്നാണ് അവർ വിശേഷിപ്പിച്ചത്.
' സ്ത്രീവിരുദ്ധരായ ബിജെപി സർക്കാർ വിജയ് ദിവസ് ആഘോഷങ്ങളിൽ നിന്ന് നമ്മുടെ ഏക വനിതാ പ്രധാനമന്ത്രി ഇന്ദിരാഗാന്ധിയെ ഒഴിവാക്കി. അവർ ഇന്ത്യയെ വിജയത്തിലേക്ക് നയിച്ചതിന്റെയും ബംഗ്ലാദേശിനെ മോചിപ്പിച്ചതിന്റെയും 50-ാം വാർഷികത്തിലാണിത്. നരേന്ദ്ര മോദിജി... സ്ത്രീകൾ നിങ്ങളുടെ പൊള്ളത്തരങ്ങൾ വിശ്വസിക്കുന്നില്ല. നിങ്ങളുടെ രക്ഷാകർതൃമനോഭാവം സ്വീകാര്യമല്ല.' - അവർ ട്വിറ്ററിൽ കുറിച്ചു.
Our first and only woman Prime Minister, Indira Gandhi is being left out of the misogynist BJP government's Vijay Diwas celebrations. This, on the 50th anniversary of the day that she led India to victory and liberated Bangladesh...1/2 pic.twitter.com/Ymlm57Ji7e
- Priyanka Gandhi Vadra (@priyankagandhi) December 16, 2021
വിഷയത്തിൽ സർക്കാരിനെ വിമർശിച്ച് രാഹുൽ ഗാന്ധിയും രംഗത്തെത്തിയിരുന്നു. ' ബംഗ്ലാദേശ് യുദ്ധ വിജയത്തിന്റെ സ്മരണാർത്ഥം ഇന്ന് ന്യൂഡൽഹിയിൽ ഒരു ചടങ്ങ് നടന്നു. എന്നാൽ മുൻ പ്രധാനമന്ത്രി ഇന്ദിരാഗാന്ധിയെക്കുറിച്ച് ചടങ്ങിൽ ഒരു പരാമർശം പോലുമുണ്ടായില്ല. രാജ്യത്തിന് വേണ്ടി 32 ബുള്ളറ്റുകൾ ഏറ്റുവാങ്ങിയ വനിതയുടെ പേര് ചടങ്ങിൽ എങ്ങുമുണ്ടായിരുന്നില്ല. എന്തെന്നാൽ ഈ സർക്കാർ സത്യത്തെ ഭയപ്പെടുന്നു' - രാഹുൽ ഗാന്ധി ട്വീറ്റ് ചെയ്തു.
