ഐ എസ് ആർ ഒയെ സ്വകാര്യവൽക്കരുത്; നീക്കം അപകടകരം: മന്ത്രി വി ശിവൻകുട്ടി

തിരുവനന്തപുരം: ശാസ്ത്രസാങ്കേതിക രംഗത്ത് ഇന്ത്യയുടെ യശസ്സ് വാനോളം ഉയർത്തിയ ഇന്ത്യയുടെ അഭിമാന സ്ഥാപനമായ ഐ എസ് ആർ ഒയെ സ്വകാര്യവൽക്കരിക്കാനുള്ള കേന്ദ്രസർക്കാർ നീക്കം അപകടകരമാണെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി. ശിവൻകുട്ടി. ഐ എസ് ആർ ഒ സ്റ്റാഫ് അസോസിയേഷന്റെ 39-ാം വാർഷിക സമ്മേളനം ഉത്ഘാടനം ചെയ്തു സംസാരിക്കുകയായിരുന്നു മന്ത്രി.

ആത്മ നിർഭർ ഭാരത് അഭിയാൻ പദ്ധതിയുടെ ഭാഗമായി തന്ത്രപ്രധാന സ്ഥാപനമായ ഐ എസ് ആർ ഒ യിൽ വലിയ തോതിലുള്ള സ്വകാര്യവൽക്കരണം നടപ്പാക്കുമെന്ന് പ്രഖ്യാപിച്ചിരിക്കുന്നത്. ഐ എസ് ആർ ഒ യുടെ എല്ലാ കേന്ദ്രങ്ങളിലെയും എല്ലാ സൗകര്യങ്ങളും ഇനി മുതൽ സ്വകാര്യകമ്പനികൾക്കും ഉപയോഗിക്കാൻ കഴിയുന്ന സ്ഥിതിയുണ്ടാകും. ജനങ്ങളുടെയാകെ നികുതി പണം ഉപയോഗിച്ച് വളർത്തിയെടുത്ത, രാജ്യത്തിന്റെ പ്രശസ്തി വാനോളം ഉയർത്തി ഒട്ടനവധി അസുലഭ വിജയങ്ങൾ ഇന്ത്യൻ ജനതയ്ക്കായി സമ്മാനിച്ച അതീവ തന്ത്രപ്രധാനമായ ഈ സ്ഥാപനത്തിന്റെ വാതിലുകൾ മൂലധന ശക്തികൾക്കായി സ്വകാര്യവൽക്കരണത്തിന്റെ പേരിൽ തുറുന്നു കൊടുക്കാനുള്ള നീക്കം ഒരു കാരണവശാലും അംഗീകരിക്കാൻ കഴിയാത്തതാണ്.

ഇന്ത്യൻ വ്യവസായ മേഖലയുടെ വളർച്ചയ്ക്കും പുരോഗതിക്കും മാത്രമല്ല രാജ്യത്തെ സമ്പദ് വ്യവസ്ഥയുടെ വളർച്ചയിലും ഐ എസ് ആർ ഒ നൽകിയിട്ടുള്ള സംഭാവന ചെറുതല്ല. ഈ മഹത്തായ സ്ഥാപനത്തിന്റെ പ്രവർത്തനം തന്നെ രാജ്യത്തെ പ്രമുഖമായ പൊതുമേഖലാ സ്ഥാപനങ്ങൾക്ക് പുറമെ അയ്യായിരത്തിലധികം വരുന്ന സ്വകാര്യസ്ഥാപനങ്ങളുടെ പങ്കാളിത്തത്തോട് കൂടിയാണ്.
സ്‌പെയ്‌സ് ആക്ടിവിറ്റിസ് ബിൽ നിലവിൽ വരുമ്പോൾ നാളിതുവരെ ഐ എസ് ആർ ഒ ക്ക് ഇന്ത്യൻ ബഹിരാകാശ മേഖലയിൽ ഉണ്ടായിരുന്ന അപ്രമാദിത്വം നഷ്ടമാകും. സ്വകാര്യ കുത്തകകൾക്കും ബഹിരാകാശ മേഖല കൈകാര്യം ചെയ്യാമെന്ന അവസ്ഥ കൈവരും.

അത്യന്തം അപകടരമായ ഈ നീക്കത്തെ ചെറുത്തു തോൽപ്പിക്കാൻ തൊഴിലാളികൾ ഒറ്റക്കെട്ടായി രംഗത്തിറങ്ങണമെന്ന് മന്ത്രി ആവശ്യപ്പെട്ടു . കേന്ദ്ര സർക്കാർ തൊഴിലാളികളുടെ താൽപര്യമല്ല മറിച്ച് മുതലാളിമാരുടെ താൽപര്യമാണ് സംരക്ഷിക്കുന്നത്. കേന്ദ്ര സർക്കാർ പ്രഖ്യാപിക്കുന്ന തൊഴിലാളി വിരുദ്ധ നയങ്ങൾ കേരളത്തിൽ നടപ്പാക്കില്ല എന്നതാണ് എൽ.ഡി.എഫ്. സർക്കാരിന്റെ ഉറച്ച നിലപാട്. ഈ പശ്ചാത്തലത്തിലാണ് കേരളം എന്ന സംസ്ഥാനം മറ്റു മേഖലകളിലെന്നപോലെ തൊഴിൽ മേഖലയിലും രാജ്യത്തിനാകെ മാതൃകയാകുന്നതെന്നും മന്ത്രി വി ശിവൻകുട്ടി ചൂണ്ടിക്കാട്ടി.