ടെമ്പോ ട്രാവലറിന് പിന്നിൽ ബൈക്ക് ഇടിച്ചു; 19 കാരി മരിച്ചു

പെരുമ്പാവൂർ: മുന്നിൽ പോവുകയായിരുന്ന വാഹനത്തിന് പിന്നിൽ ബൈക്ക് ഇടിച്ചുണ്ടായ അപകടത്തിൽ 19കാരി മരിച്ചു. സുഹൃത്തിനൊപ്പം യാത്ര ചെയ്ത കോതമംഗലം പാലമറ്റം പഴക്കര വീട്ടിൽ മീനു തോമസ് (19) ആണ് മരിച്ചത്. ഇരിങ്ങോൾ വൈദ്യശാലപ്പടിയിൽ വൈകിട്ട് അഞ്ച് മണിയോടെയായിരുന്നു അപകടം.

സുഹൃത്ത് നേര്യമംഗലം പുത്തൻപുരയ്ക്കൽ വിഷ്ണുജയനോ(22)ടൊപ്പം കോതമംഗലം ഭാഗത്തേയ്ക്ക് ബൈക്കിൽ വരവെ ഇവർ സഞ്ചരിച്ചിരുന്ന ബൈക്ക് മുന്നിൽ പോകുകയായിരുന്ന ടെമ്പോ ട്രാവലറിൽ ഇടിക്കുകയായിരുന്നു.

ട്രാവലർ സമീപത്തെ പെട്രോൾ പമ്പിലേയ്ക്ക് തിരിക്കുകയായിരുന്നെന്നാണ് പൊലീസ് നൽകുന്ന സൂചന. പരുക്കേറ്റ മീനു തോമസിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

പരിക്കേറ്റ വിഷ്ണുവിനെ പെരുമ്പാവൂരിലെ സ്വകാര്യആശുപത്രിയിൽ പ്രഥമശുശ്രൂഷ നൽകിയ ശേഷം വിട്ടയച്ചു. പെരുമ്പാവൂർ പൊലീസ് തുടർനടപടികൾ സ്വീകരിച്ചു. റിജയാണ് മിനുവിന്റെ
മാതാവ്, സഹോദരങ്ങൾ: മിഥുൻ, അന്ന മരിയ