ധനകാര്യ മന്ത്രി ഇടപെട്ടു; സി എസ് ബി ബാങ്ക് സമരം മാറ്റിവച്ചു

തൃശൂർ: ധനകാര്യ മന്ത്രിയുടെ ഇടപെടലിനെ തുടർന്ന് സി എസ് ബി ബാങ്ക് പണിമുടക്ക് നീട്ടിവച്ചു. ഡിസംബർ 30, 31, ജനുവരി 1 തീയതികളിൽ നടത്താനിരുന്ന സമരമാണ് മാറ്റിവച്ചത്.

ബാങ്കിന്റെ എച്ച്ആർ മേധാവി ടി ജയശങ്കർ സംഘടനകളെ ചർച്ചക്ക് വിളിച്ചു. വിവിധ യൂണിയനുകളെ പ്രതിനിധീകരിച്ച് കെജെ ലതീഷ് കുമാർ, ജെറിൻ കെ ജോൺ, ജോസഫ് കുരിയാക്കോസ്, ബാബു മൊയ്‌ലൻ ചർച്ചയിൽ പങ്കെടുത്തു. ധനകാര്യ മന്ത്രി ഇടപെട്ടതിന്റെ പശ്ചാത്തലത്തിൽ തുടർ ചർച്ചകൾ നടക്കുമെന്നും സംഘടനകൾ നിർദ്ദിഷ്ട പണിമുടക്ക് മാറ്റിവെയ്ക്കണമെന്നും ബാങ്ക് അധികാരികൾ ആവശ്യപ്പെട്ടു.

ബാങ്ക് യൂണിയനുകൾ അടിയന്തര യോഗം ചേർന്ന് സാഹചര്യം വിലയിരുത്തി. സംസ്ഥാന സർക്കാരും അസി. ലേബർ കമ്മീഷണറും ഇടപെട്ട് ഒത്തുതീർപ്പിനു അവസരമൊരുക്കിയതിനെ തുടർന്ന് പണിമുടക്ക് മാറ്റിവെയ്ക്കാൻ യൂണിയനുകൾ തീരുമാനിക്കുകയായിരുന്നു.