ജോൺ കാറ്റാടിയായി മോഹൻലാൽ, മകനായി പൃഥ്വി; 'ഫൺ ഫാമിലി എന്റർടെയ്‌നർ'; 'ബ്രോ ഡാഡി'യുടെ ടീസർ; റിലീസ് തീയതി ഉടൻ പ്രഖ്യാപിച്ചേക്കും
കൊച്ചി: മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന 'ബ്രോ ഡാഡി'യുടെ ടീസർ പുറത്തെത്തി. വൻ വിജയം നേടിയ ലൂസിഫറിനു ശേഷം മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ചിത്രമാണിത്. ജോൺ കാറ്റാടി എന്നാണ് മോഹൻലാൽ അവതരിപ്പിക്കുന്ന ടൈറ്റിൽ കഥാപാത്രത്തിന്റെ പേര്. ഈശോ ജോൺ കാറ്റാടി എന്ന മകൻ കഥാപാത്രമായി പൃഥ്വിരാജും എത്തുന്നു.
ശ്രീജിത്ത് എൻ, ബിബിൻ മാളിയേക്കൽ, സജീവ് പാഴൂർ എന്നിവരുടേതാണ് രചന. ഫൺ ഫാമിലി എന്റർടെയ്‌നർ സ്വഭാവത്തിലുള്ള ചിത്രമായിരിക്കും ഇതെന്നാണ് ടീസർ പറയുന്നത്. ഡിസ്‌നി പ്ലസ് ഹോട്ട്സ്റ്റാറിന്റെ ഡയറക്റ്റ് റിലീസ് ആണ് ചിത്രം. റിലീസ് തീയതി ഇനിയും പ്രഖ്യാപിച്ചിട്ടില്ല.
മീന, കല്യാണി പ്രിയദർശൻ, ലാലു അലക്‌സ്, കനിഹ, ജഗദീഷ്, സൗബിൻ ഷാഹിർ, ഉണ്ണി മുകുന്ദൻ എന്നിവരാണ് മറ്റു പ്രധാന വേഷങ്ങളിൽ എത്തുന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മാണം. ഛായാഗ്രഹണം അഭിനന്ദൻ രാമാനുജം, സംഗീതം ദീപക് ദേവ്, എഡിറ്റിങ് അഖിലേഷ് മോഹൻ.
ലൂസിഫറിന്റെ തുടർച്ചയായ എമ്പുരാൻ എന്ന ചിത്രമാണ് പൃഥ്വി രണ്ടാമതായി സംവിധാനം ചെയ്യാനിരുന്നതെങ്കിലും കോവിഡ് സാഹചര്യം പരിഗണിച്ച് താരതമ്യേന പരിമിതമായ സാഹചര്യങ്ങളിൽ പൂർത്തിയാക്കാനാവുന്ന ഒരു ചിത്രം വന്നപ്പോൾ പൂർത്തിയാക്കുകയായിരുന്നു.
