വെടിയേറ്റിട്ടും കൊലയാളിയെ വെടിവച്ചു വീഴ്‌ത്തിയ ഓഫീസർക്ക് അഭിനന്ദനങ്ങളുടെ പ്രവാഹം
കൊളറാഡോ : തിങ്കളാഴ്ച വൈകീട്ട് ഡെൻവർ കൊളറാഡോയിൽ അഞ്ചു പേരെ വെടിവച്ചു കൊലപ്പെടുത്തിയ പ്രതിയെ വെടിവച്ചു വീഴ്‌ത്തിയ ലേക്ക് വുഡ് പൊലീസ് ഏജന്റ് ആഷ്ലി ഫെറിസിന് (28) അഭിനന്ദനങ്ങളുടെ പ്രവാഹം . ഇവരെ കുറിച്ചുള്ള വിവരം പൊലീസ് ഇന്നലെയാണ് വെളിപ്പെടുത്തിയത് .
വിവിധ സ്ഥലങ്ങളിൽ നാല് പേരെ വെടിവച്ചു കൊലപ്പെടുത്തിയ ശേഷം ഹെയറ്റ് ഹൗസ് ഹോട്ടൽ ക്ലർക്ക് സാറാ സ്റ്റിക്കിനെ (28) വെടിവച്ചു പുറത്തേക്ക് രക്ഷപ്പെടാൻ ശ്രമിച്ച പ്രതിയോട് (ലിൻഡൻ മെക്ക് ലിയോഡ് (47) തോക്ക് താഴെയിടാൻ അവിടെ എത്തിയ പൊലീസ് ഏജന്റ് ആഷ്ലി ആവശ്യപ്പെട്ടു . പ്രതി മറുപടി നൽകിയത് ഏജന്റിന്റെ ഉദരത്തെ ലക്ഷ്യമാക്കി കാഞ്ചി വലിച്ചാണ് . വെടിയേറ്റ ഏജന്റ് സ്ഥലകാല ബോധം വീണ്ടെടുത്ത് പ്രതിക്ക് നേരെ നിറയൊഴിച്ചു , ദേഹത്തൂടെ പ്രതിയുടെ നരഹത്യക്ക് വിരാമമിട്ടു .
കൃത്യസമയത്ത് ഓഫീസർ അവിടെ എത്തിയില്ലായിരുന്നുവെങ്കിൽ ഇയാളുടെ തോക്കിനു എത്ര പേര് ഇരയാകും എന്ന് പറയുക അസാധ്യമായിരുന്നുവെന്നാണ് ലേക്ക് വുഡ് പൊലീസ് വക്താവ് ജോൺ റൊമിറോ പറയുന്നത് . പ്രതി നേരത്തെ രണ്ടു തവണ പൊലീസിന്റെ നിരീക്ഷണവലയത്തിലായിരുന്നു , കേസ് ചാർജ് ചെയ്തിരുന്നില്ല . അഞ്ചു പേരെ വെടിവച്ചു വീഴ്‌ത്തിയ പ്രതി ലക്ഷ്യമിട്ടിരുന്നത് ടാറ്റൂ പാർലേഴ്‌സിലെ ജീവനക്കാരെയായിരുന്നു . കൊല്ലപ്പെട്ട നാലുപേരും ടാറ്റുമായി ബന്ധപ്പെട്ടവരായിരുന്നു . ഹോട്ടൽ ജീവനക്കാരിയെ പ്രതിക്ക് നേരത്തെ അറിയാമായിരുന്നുവെന്നാണ് പൊലീസ് വിശ്വസിക്കുന്നത് .
ബുള്ളറ്റ് പ്രൂഫ് വെസ്റ്റ് ധരിച്ചിരുന്നുവെങ്കിലും ഉദരത്തിൽ വെടിയേറ്റ ഓഫീസറെ അടിയന്തിര ശസ്ത്രക്രിയക്ക് വിധേയരാക്കി , സുഖം പ്രാപിച്ചു വരുന്നുവെന്നാണ് പൊലീസ് അറിയിച്ചത് .
