ജമ്മു കശ്മീരിൽ ശക്തമായ ഭൂചലനം; റിക്ടർ സ്‌കെയിലിൽ 5.1 തീവ്രത രേഖപ്പെടുത്തി; ഒരാഴ്ചക്കിടെ രണ്ടാമത്തേത്
ഡൽഹി: ജമ്മു കശ്മീരിൽ ശക്തമായ ഭൂചലനം അനുഭവപ്പെട്ടു. റിക്ടർ സ്‌കെയിൽ 5.1 തീവ്രത രേഖപ്പെടുത്തിയ ഭൂചലനം ഇന്ന് വൈകിട്ട് 6.45 ഓടെയാണ് അനുഭവപ്പെട്ടത്. അഫ്ഗാനിസ്ഥാന്റെയും താജിക്കിസ്ഥാന്റെയും അതിർത്തി പ്രദേശത്താണ് ഭൂചലനത്തിന്റെ പ്രഭവകേന്ദ്രമെന്നാണ് വിലയിരുത്തൽ. ഇന്ത്യക്ക് പുറമെ പാക്കിസ്ഥാനിലും ചൈനയിലും ഭൂചലനം അനുഭവപ്പെട്ടു.
ഭൂപ്രതലത്തിൽ നിന്ന് 216 കിലോമീറ്റർ താഴെയാണ് ഭൂചലനത്തിന്റെ പ്രഭവ കേന്ദ്രം. ഈയാഴ്ച തന്നെ ഇത് രണ്ടാമത്തെ തവണയാണ് കശ്മീരിൽ ഭൂചലനം അനുഭവപ്പെടുന്നത്. തിങ്കളാഴ്ച 5.3 തീവ്രത രേഖപ്പെടുത്തിയ ഭൂചലനമാണ് അനുഭവപ്പെട്ടത്. തിങ്കളാഴ്ച രാത്രി ഏഴ് മണിയോടെയായിരുന്നു അന്നത്തെ പ്രകമ്പനം.
സംഭവത്തിൽ ആളപായമോ, നാശനഷ്ടങ്ങളോ റിപ്പോർട്ട് ചെയ്തിട്ടില്ല. വലിയ പ്രകമ്പനത്തോടെയാണ് ഭൂചലനം ഉണ്ടായത്. ഫയാസ്ബാദിൽ നിന്നും 84 കിലോ മീറ്റർ തെക്ക് കിഴക്കായി അക്ഷാംശം 71.20 ഡിഗ്രി കിഴക്കും, രേഖാംശം 36.55 ഡിഗ്രി വടക്കുമായി 216 കിലോ മീറ്റർ ആഴത്തിലാണ് ഭൂചലനത്തിന്റെ പ്രഭവ കേന്ദ്രമെന്ന് നാഷണൽ സെന്റർ ഫോർ സീസ്മോളജി അറിയിച്ചു.
