പിണങ്ങിപ്പോയ ഭാര്യ കേക്കെടുത്ത് ഭർത്താവിന്റെ മുഖത്തേക്ക് വലിച്ചെറിഞ്ഞു; കലിമൂത്ത് ഭാര്യാ മാതാവിന്റെ തലയ്ക്കടിച്ചു പരിക്കേൽപ്പിച്ച യുവാവ് അറസ്റ്റിൽ

കോഴിക്കോട്: ഭാര്യയോടുള്ള കലിമൂത്ത് ഭാര്യാമാതാവിനെ തലയ്ക്കടിച്ച് ഗുരുതരമായി പരുക്കേൽപ്പിച്ച കേസിൽ മരുമകൻ അറസ്റ്റിൽ. കോഴിക്കോട് വളയം കല്ലുനിര സ്വദേശി ചുണ്ടേമ്മൽ ലിജിൻ (25) ആണ് അറസ്റ്റിലായത്. ലിജിന്റെ അടിയിൽ തലയ്ക്ക് ഗുരുതകമായി പരിക്കേറ്റ വളർപ്പാംകണ്ടി പുഴക്കൽ സ്വദേശിനി മഹിജ (48) കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലാണ്.

ശനിയാഴ്ച ഉച്ചയ്ക്കായിരുന്നു സംഭവം. ഇന്നലെയാണ് ലിജിനെ പൊലീസ് അറസ്റ്റ് ചെയ്തത്്. കുടുംബകലഹമാണ് ആക്രമണത്തിന് കാരണമെന്നു പൊലീസ് പറഞ്ഞു. പിണങ്ങിപ്പോയ ഭാര്യയ്ക്ക് പുതുവത്സരത്തോടനുബന്ധിച്ച് ലിജിൻ കേക്ക് വാങ്ങി നൽകിയിരുന്നു. എന്നാൽ, ഭാര്യ കേക്കെടുത്ത് ലിജിന്റെ മുഖത്തെറിഞ്ഞു. ഇതിന്റെ പ്രതികാരം തീർക്കാൻ ചെന്നപ്പോഴാണ് സംഭവമുണ്ടായത്. വളയം പൊലീസ് അറസ്റ്റ് ചെയ്ത പ്രതിയെ ഇന്ന് കോടതിയിൽ ഹാജരാക്കും.