അമൃതാനന്ദമയി മഠം ചെയ്യുന്ന സേവന പ്രവർത്തനങ്ങൾ പ്രശംസനീയം; വാനോളം പുകഴ്‌ത്തി മന്ത്രി എം.വി ഗോവിന്ദൻ
കണ്ണൂർ: സിപിഎം ആൾദൈവമായി വിശേഷിപ്പിക്കുന്ന മാതാ അമൃതാനന്ദമയി നടത്തുന്ന സേവന പ്രവർത്തനങ്ങളെ പുകഴ്‌ത്തി മന്ത്രി എം.വി ഗോവിന്ദൻ.സിപിഎമ്മിന്റെ പ്രത്യയ ശസ്ത്ര വിദഗ്ദ്ധനും വൈരുധ്യാത്മിക ഭൗതികവാദം ഇഴകീറി പരിശോധിക്കുകയും ചെയ്യുന്ന മന്ത്രി എം വി ഗോവിന്ദൻ മാതാ അര്യതാനന്ദമയി മഠം ചെയ്യുന്ന സേവന പ്രവർത്തനങ്ങളെ വാനോളം പുകഴ്‌ത്തിയാണ് രംഗത്തുവന്നത്.
കോവിഡ് കാലത്ത് സമൂഹത്തിലെ പാവപ്പെട്ട ജനവിഭാഗങ്ങളിലേക്ക് സഹായങ്ങൾ എത്തിച്ചു നൽകുന്ന മാതാ അമൃതാനന്ദമയി മഠത്തിന്റെ സേവനങ്ങൾ ഏറെ പ്രശംസനീയമാണെന്ന് എം.വി ഗോവിന്ദൻ പറഞ്ഞു. അമൃതശ്രീ പദ്ധതിയുടെ ഭാഗമായി കണ്ണൂർ മേഖലയിലെ അമൃതശ്രീ അംഗങ്ങൾക്കും പ്രളയബാധിതർക്കുമുള്ള ഭക്ഷ്യ,വസ്ത്ര,ധന സഹായങ്ങളുടെ വിതരണം ഓൺലൈനായി ഉദ്ഘാടനം ചെയ്യുകയായിരുന്നു അദ്ദേഹം.
കോവിഡ് കാലത്ത് നിരവധി സേവന പ്രവർത്തനങ്ങൾക്ക് മഠം നേതൃത്വം നൽകുന്നുണ്ട്. ഇത്തരം പരിശ്രമങ്ങൾ എല്ലാവർക്കും മാതൃകയാണെന്നും മന്ത്രി കൂട്ടിച്ചേർത്തു. കക്കാട് അമൃത വിദ്യാലയത്തിൽ നടന്ന ചടങ്ങിൽ കണ്ണൂർ കോർപ്പറേഷൻ മേയർ ടി. ഒ മോഹനൻ അധ്യക്ഷത വഹിച്ചു. എല്ലാ പ്രദേശങ്ങളിലും അശരണർക്ക് താങ്ങാകാൻ അമൃതശ്രീ പദ്ധതിയിലൂടെ സാധിക്കുന്നുണ്ടെന്നത് ഏറെ സന്തോഷം നൽകുന്ന കാര്യമാണെന്ന് മേയർ പറഞ്ഞു.
മാനവസമൂഹത്തിന് മുന്നിൽ അമ്മ അവതരിപ്പിക്കുന്ന ആശയങ്ങൾ എക്കാലവും പ്രസക്തിയുള്ളതാണെന്ന് ചടങ്ങിൽ സംസാരിച്ച ബിജെപി ദേശീയ നിർവാഹകസമിതിയംഗം പി.കെ കൃഷ്ണദാസ് പറഞ്ഞു. നിരവധി സ്ത്രീകൾക്ക് തൊഴിൽ പരിശീലനങ്ങളും തൊഴിൽ സംരംഭങ്ങൾക്കുള്ള സഹായവുമെല്ലാം നൽകാൻ അമൃതശ്രീയിലൂടെ കഴിയുന്നുണ്ട്. കേന്ദ്ര-സംസ്ഥാന സർക്കാരുകൾക്ക് പോലും സാധിക്കാത്ത വിധത്തിൽ ആശയങ്ങൾ നടപ്പാക്കാൻ മാതാ അമൃതാനന്ദമയി ദേവിക്കും മഠത്തിനും സാധിക്കുന്നുണ്ടെന്നും പി.കെ കൃഷ്ണദാസ് പറഞ്ഞു. ചടങ്ങിൽ കണ്ണൂർ മാതാ അമൃതാനന്ദമയീമഠത്തിലെ സ്വാമി അമൃതകൃപാനന്ദ പുരി അനുഗ്രഹപ്രഭാഷണം നടത്തി. അമൃതശ്രീ കോ-ഓർഡിനേറ്റർ ആർ.രംഗനാഥൻ, മുന്മന്ത്രി കടന്നപ്പള്ളി രാമചന്ദ്രൻ, മുൻ ഡെപ്യൂട്ടി കളക്ടർ മോഹനൻ പൊന്നമ്പത്ത് എന്നിവർ സംസാരിച്ചു.
കണ്ണൂർ ജില്ലയിൽ 8000 ത്തിലധികം കുടുംബങ്ങൾക്കാണ് സഹായങ്ങൾ വിതരണം ചെയ്തത്. കോവിഡ് മഹാമാരി ആരംഭിച്ചതുമുതൽ വിവിധ സഹായപദ്ധതികൾക്കായി ആകെ 85 കോടി രൂപയുടെ ധനസഹായം അമൃതാനന്ദമയീ മഠം നൽകിയിരുന്നു. അമൃതശ്രീ പദ്ധതി 17 വർഷം പിന്നിടുന്നതിനോടനുബന്ധിച്ച് ധനസഹായത്തിന് പുറമെ, ഭക്ഷ്യവസ്തുക്കളും വസ്ത്രങ്ങളും എല്ലാ ജില്ലകളിലും വിതരണം ചെയ്ത് വരുകയാണ്. ഇതിനു പുറമേ തൊഴിൽരഹിതർക്കും, സാമ്പത്തികമായി ദുർബലരായ സ്ത്രീകൾക്കുമായുള്ള സാമ്പത്തിക സഹായങ്ങടക്കമുള്ള നിരവധി പദ്ധതികളാണ് നടപ്പാക്കിവരുന്നത്. സുനാമിയുടെ പശ്ചാത്തലത്തിൽ 2004 ലാണ് വനിതകളുടെ ഉന്നമനം ലക്ഷ്യമിട്ട് മാതാ അമൃതാനന്ദമയീദേവി ആഹ്വാനം ചെയ്ത അമൃതശ്രീ പദ്ധതി ആരംഭിക്കുന്നത്. വൈദഗ്ധ്യം ആവശ്യമായ വിവിധ തൊഴിലുകൾക്കുള്ള പരിശീലനം, കൈത്തൊഴിൽ പരിശീലനം, ചെറുകിട സംരംഭങ്ങൾക്കായുള്ള സാമ്പത്തിക സഹായങ്ങൾ തുടങ്ങിയവും ഈ പദ്ധതിയിലൂടെ നടപ്പാക്കുന്നുണ്ട്.
