ചെന്നൈ: ഹെലികോപ്റ്റർ അപ്രതീക്ഷിതമായി വയലിൽ ഇറങ്ങിയപ്പോൾ അമ്പരന്ന് നാട്ടുകാർ. ബെംഗളൂരുവിൽ നിന്നു രോഗിയുമായി കൊച്ചിയിലേക്കു പോയ സ്വകാര്യ ഹെലികോപ്റ്ററാണ് മോശം കാലാവസ്ഥയെ തുടർന്നു സത്യമംഗലത്തിനു സമീപത്തെ വയലിൽ ഇറക്കി. ഹെലികോപ്റ്റർ വയലിൽ ഇറങ്ങുന്ന കാഴ്ചകണ്ട് നാട്ടുകാരും വട്ടം കൂടി. ഈറോഡ് ജില്ലയിലെ കടമ്പൂർ മലനിരകൾക്കു മുകളിലൂടെ പറന്ന ഹെലികോപ്റ്ററാണ് രാവിലെ 11.15ന് സത്യമംഗലത്തിനു സമീപത്തെ അത്തിയൂരിൽ നിലത്തിറക്കിയത്.

ഗ്രാമത്തിൽ അപ്രതീക്ഷിതമായി ഹെലികോപ്റ്റർ ഇറങ്ങിയതോടെ നാട്ടുകാരും അമ്പരപ്പിലായി. ഹെലികോപ്റ്ററിലുണ്ടായിരുന്ന നാലു പേരും സുരക്ഷിതരാണ്. ബംഗളൂരു സ്വദേശിയായ ഭരത് ഭാര്യ ഷീലയെ കൊച്ചിയിലെ സ്വകാര്യ ആശുപത്രിയിലെത്തിക്കാൻ വാടകയ്‌ക്കെടുത്ത ഹെലികോപ്റ്ററായിരുന്നു ഇത്. പൈലറ്റ് ക്യാപ്റ്റൻ ജസ്പാൽ, എൻജിനീയർ അങ്കിത് സിങ് എന്നിവരും ഹെലികോപ്റ്ററിലുണ്ടായിരുന്നു.

മേഖലയിൽ കനത്ത മൂടൽ മഞ്ഞുണ്ടായിരുന്നതിനെ തുടർന്നാണു ഹെലികോപ്റ്റർ അടിയന്തരമായി നിലത്തിറക്കിയതെന്നു പൈലറ്റ് അറിയിച്ചു. തുടർന്നു കടമ്പൂർ പൊലീസും സ്ഥലത്തെത്തി വിവരങ്ങൾ ചോദിച്ചറിഞ്ഞു. കാലാവസ്ഥ മെച്ചപ്പെട്ടതോടെ 1.30നു ഹെലികോപ്റ്റർ കൊച്ചിയിലേക്കു തിരിച്ചു.

 

ഹെലികോപ്റ്റർ