അമിത ലാഭമാണ് പൊതുവേ കച്ചവടക്കാരുടെ ലക്ഷ്യം. എന്നാൽ ഇത്തരക്കാർക്കിടയിൽ തികച്ചും വ്യത്യസ്തമാവുകയാണ് ചെന്നൈയിൽ നിന്നുള്ള ഒരു എഴുപതുകാരി. എല്ലാത്തിനും വിലക്കൂടി ഈ സമയത്തും ഒന്നര രൂപയ്ക്ക് ഇഡ്ഡലി വിറ്റ് വ്യത്യസ്തയാവുകയാണ് വെറോണിക്കയെന്ന എഴുപതുകാരി. ഇഡ്ഡലി മാത്രമല്ല, ഒപ്പം സാമ്പാറും ചട്ണിയും കൂടി നൽകുന്നുണ്ട് ഈ വിലയ്ക്ക്. കച്ചവടത്തിൽ തനിക്ക് ലാഭമല്ല, സംതൃപ്തിയാണ് വലുതെന്ന് വെറോണിക്ക പറയുന്നു

ചെന്നൈയിലെ അടമ്പാക്കത്തെ വാടകവീട്ടിൽ 72 വയസ്സുകാരനായ ഭർത്താവ് നിക്കോളാസിനൊപ്പമാണ് വെറോണിക്കയുടെ താമസം. കഴിഞ്ഞ 20 വർഷമായി ഇഡ്ഡലി വിൽക്കുകയാണ് വെറോണിക്ക. ആവശ്യക്കാർക്ക് വീടുകളിലെത്തിച്ചും നൽകും. ഇതിന് ഇവർക്ക് വേറെ പണം നൽകേണ്ടതില്ല. ഒരു ദിവസത്തെ കച്ചവടം കഴിഞ്ഞാൽ 300 രൂപയാണ് ലഭിക്കുക. ഈ പണം അടുത്ത ദിവസത്തെ ഇഡ്ഡലി തയ്യാറാക്കാൻ വേണ്ടിവരുമെന്ന് വെറോണിക്ക പറയുന്നു. അതായത് കച്ചവടത്തിൽ പ്രത്യേകിച്ച് ലാഭം ഒന്നുമില്ല. എന്നാൽ താൻ ഇത് തന്റെ സംതൃപ്തിക്ക് വേണ്ടി ചെയ്യുന്നതാണെന്നും അല്ലാതെ ലാഭത്തിന് വേണ്ടിയല്ലെന്നുമാണ് വെറോണിക്ക പറയുന്നത്.

പത്തു രൂപയ്ക്ക് പോലും ഇഡ്ഡലി വിൽക്കാൻ പറ്റാത്ത ഈ കാലത്താണ് വെറോണിക്കയുടെ ഒന്നര രൂപാ കച്ചവടം. ഓരോ ദിവസവും കച്ചവടത്തിനായി ദിവസവും രാവിലെ വെറോണിക്ക പുറപ്പെടും. ആദ്യം ഒരു ഇഡ്ഡലിക്ക് 50 പൈസയും ഒരു രൂപയുമായിരുന്നു വില. പിന്നീട് സാമ്പാറും ചട്ണിയും കൂടി ചേർത്ത് വില ഒന്നര രൂപയാക്കി. വെറോണിക്കയുടെ ഇഡ്ഡലിക്കായി നൂറിലധികം കുടുംബങ്ങൾ കാത്തിരിക്കുന്നുണ്ട്.

ഭർത്താവ് നിക്കോളാസ് ഈ പ്രായത്തിൽ ചെന്നെയിലെ ഒരു ബാങ്ക് എ.ടി.എമ്മിന്റെ സെക്യൂരിറ്റി ജീവനക്കാരനാണ്. അദ്ദേഹത്തിന്റെ ശമ്പളത്തിൽ നിന്നാണ് ഇവരുടെ ദൈനംദിന ചെലവുകൾ നടക്കുന്നത്. താനും തന്റെ വിവാഹിതരായ മൂന്നു പെൺമക്കളും വെറോണിക്കയുടെ കച്ചവടത്തിൽ ഇടപെടാറില്ലെന്ന് ഭർത്താവ് നിക്കോളാസ് പറയുന്നു. എല്ലാം ചെയ്യുന്നത് വെറോണിക്ക തനിച്ചാണ്. ഇത്രയും വീട്ടുകാർക്ക് ഏത് ബുദ്ധിമുട്ടുള്ള കാലത്തും വെറോണിക്ക ഭക്ഷണം എത്തിച്ചിരുന്നു.

ദിവസവും വെളുപ്പിന് മൂന്നുമണിക്ക് എഴുന്നേറ്റാണ് ഇഡ്ഡലി തയ്യാറാക്കുന്നത്. പലതവണ ശ്രമിച്ചെങ്കിലും ഞങ്ങൾക്ക് ഇതുവരെ വാർധക്യ പെൻഷൻ ഒന്നും കിട്ടിയിട്ടില്ല- നിക്കോളാസ് പറയുന്നു.

ഇഡ്ഡലിഎഴുപതുകാരിഒന്നര രൂപ