മാവേലിക്കരയിൽ അടഞ്ഞു കിടന്ന വീട്ടിൽ മോഷണം; ബംഗാൾ സ്വദേശികൾ അറസ്റ്റിൽ

ആലപ്പുഴ: മാവേലിക്കരയിൽ അടഞ്ഞു കിടന്ന വീട്ടിൽ മോഷണം നടത്തിയ ബംഗാൾ സ്വദേശികൾ അറസ്റ്റിൽ. തറിക്വിൽ ഗസ്സി (25), ഷാഹിൻ മണ്ഡൽ (31) എന്നിവരാണ് അറസ്റ്റിലായത്. 26നു രാത്രി ഒന്നിന് എസ്ഐ വർഗീസ് മാത്യുവിന്റെ നേതൃത്വത്തിലുള്ള പൊലീസ് സംഘം പട്രോളിങ് നടത്തുന്നതിനിടെയാണ് സൈക്കിളിലെത്തിയ പ്രതികൾ മോഷ്ടിച്ച വസ്തുക്കളുമായി പിടിയിലായത്.

സഞ്ചിയിൽനിന്ന് നിലവിളക്ക്, കിണ്ടി, താലം, കൈവിളക്ക് എന്നീ ഓട്ടുപകരണങ്ങളും ചുറ്റിക, കമ്പി തുടങ്ങിയവയും കണ്ടെത്തി. കുന്നംനമ്പ്യാർ വില്ലയിൽ വീടിന്റെ അടുക്കളവാതിൽ തകർത്തു പൂജാമുറിയിൽനിന്ന് മോഷ്ടിച്ചതാണ് ഓട്ടുപകരണങ്ങളെന്ന് പ്രതികൾ സമ്മതിച്ചു. ഉടമസ്ഥൻ ഡൽഹിയിലായതിനാൽ വീട് അടഞ്ഞു കിടക്കുകയാണ്.