ബിസിനസ് ലാഭത്തിന് മുകളിൽ ഒമ്പത് ശതമാനം കോർപ്പറേറ്റ് നികുതി; സുപ്രധാന നീക്കവുമായി യുഎഇ
ദുബായ്: രാജ്യത്ത് 2023 ജൂൺ ഒന്ന് മുതൽ ബിസിനസ് ലാഭത്തിന് മുകളിൽ ഒമ്പത് ശതമാനം കോർപ്പറേറ്റ് നികുതി ഏർപ്പെടുത്തുമെന്ന് യു.എ.ഇ. ധനമന്ത്രാലയം അറിയിച്ചു. 2023 ജൂൺ ഒന്നിനോ അതിനുശേഷമോ ആരംഭിക്കുന്ന ആദ്യ സാമ്പത്തിക വർഷത്തിന്റെ തുടക്കം മുതൽ കോർപ്പറേറ്റ് നികുതി ബിസിനസുകൾക്ക് ബാധകമാകും.
ആഗോള വിപണികളുമായി പൊരുത്തപ്പെടാൻ രാജ്യത്തെ വെള്ളി-ശനി വാരാന്ത്യ അവധികൾ ശനി-ഞായർ ദിവസങ്ങളിലേക്ക് ഈ വർഷം മാറ്റിയിരുന്നു. ഇതിനുശേഷമുള്ള യു.എ.ഇയുടെ ഏറ്റവും സുപ്രധാന നീക്കമാണ് ഈ പ്രഖ്യാപനം. റിയൽ എസ്റ്റേറ്റിൽ നിന്നോ മറ്റ് നിക്ഷേപങ്ങളിൽ നിന്നോ വ്യക്തിഗത ആദായനികുതിയും മറ്റും ഏർപ്പെടുത്താൻ പദ്ധതിയില്ലെന്ന് മന്ത്രാലയം അറിയിച്ചു.
375,000 ദിർഹം വരെയുള്ള ലാഭത്തിന് നികുതിയുണ്ടാകില്ലെന്നും മന്ത്രാലയം അറിയിച്ചു. അതേസമയം വ്യക്തിഗത വരുമാനത്തിന് കോർപ്പറേറ്റ് നികുതി ബാധകമാകില്ല.
പ്രധാന എണ്ണ കയറ്റുമതി രാജ്യമാണെങ്കിലും വ്യാപാരം, ഗതാഗതം, ടൂറിസം എന്നിവയിലും ശ്രദ്ധ കേന്ദ്രീകരിക്കുന്ന യു.എ.ഇ. ക്രൂഡോയിലിനെ മാത്രം ആശ്രയിക്കുന്നത് കുറയ്ക്കുന്നതിനുള്ള ശ്രമങ്ങൾ തുടരുകയാണ്.
ലോകത്തിലെ ഏറ്റവും വലിയ എണ്ണ കയറ്റുമതിക്കാരായ അയൽരാജ്യമായ സൗദി അറേബ്യയിൽ നിന്ന് വർധിച്ചുവരുന്ന മത്സരവും യു.എ.ഇ. അഭിമുഖീകരിക്കുന്നുണ്ട്. അതിനാൽ തന്നെ സമ്പദ് വ്യവസ്ഥയെ വൈവിധ്യവത്കരിക്കാനും വിദേശ ബിസിനസുകളെ രാജ്യത്തേക്ക് ആകർഷിക്കാനുമുള്ള നീക്കങ്ങൾ തുടരുകയാണ്.
