ന്യൂഡൽഹി: ഫെബ്രുവരി ഒന്നുമുതൽ വാണിജ്യ ഉപയോഗത്തിനുള്ള എൽപിജി സിലിണ്ടറുകളുടെ വിലയിൽ 91.5 രൂപ കുറവ് വരുത്തി എണ്ണക്കമ്പനികൾ. ഇതോടെ, ഡൽഹിയിൽ 19 കിലോഗ്രാം ഭാരമുള്ള വാണിജ്യ ഉപയോഗത്തിനുള്ള എൽപിജി സിലിണ്ടറിന്റെ വില 1,907 രൂപയായി.

ഡിസംബറിൽ ഇത് 2,101 രൂപയായി ഉയർത്തിയിരുന്നു. കേന്ദ്രമന്ത്രിയുടെ ബജറ്റ് അവതരണം തുടങ്ങുന്നതിനു മുൻപായിരുന്നു എണ്ണക്കമ്പനികൾ എൽപിജി സിലിണ്ടറിന്റെ വില കുറച്ചത്.

മുംബൈയിൽ വാണിജ്യ ഗ്യാസ് സിലിണ്ടറിന്റെ വില 91.5 രൂപ കുറഞ്ഞതോടെ 1,857 രൂപയാകും. ചെന്നൈയിൽ 19 കിലോഗ്രാം വാണിജ്യ ഗ്യാസ് സിലിണ്ടറിന് 50.5 രൂപ കുറച്ചതോടെ വില 2,080.5 രൂപയായി.

അതേസമയം, ഒക്ടോബർ മുതൽ, സബ്സിഡിയില്ലാത്ത ഗാർഹിക എൽപിജി സിലിണ്ടറുകളുടെ വിലയിൽ മാറ്റം വരുത്തിയിട്ടില്ല. ഡൽഹിയിൽ സബ്‌സിഡിയില്ലാത്ത 14.2 കിലോഗ്രാം ഇൻഡെയ്ൻ എൽപിജി ഗ്യാസ് സിലിണ്ടറിന്റെ വില 899.50 രൂപയും കൊൽക്കത്തയിൽ 926 രൂപയുമാണ്.

ന്യൂസ് ഡെസ്‌ക്‌

    ന്യൂസ് ഡെസ്‌ക്‌