തൗര്യത്രിക കലയായ കഥകളിയുടെ സമസ്തമേഖലയിലും തന്റേതായ കയ്യൊപ്പു പതിപ്പിച്ച യശ:ശരീരനായ കലാമണ്ഡലം കൃഷ്ണൻകുട്ടി പൊതുവാളുടെ സ്മരണക്കായി കലാസാഗർ ഏർപ്പെടുത്തിയ പുരസ്‌കാരത്തിനുള്ള നാമനിർദ്ദേശം കലാസ്വാദകരിൽ നിന്ന് ക്ഷണിക്കുന്നു. കഥകളി വേഷം, സംഗീതം, ചെണ്ട, മദ്ദളം, ചുട്ടി തുടങ്ങിയ മേഖലയിലെ കലാകാരന്മാരെയും ഓട്ടൻതുള്ളൽ, ചാക്യാർകൂത്ത്, കൂടിയാട്ടം, മോഹിനിയാട്ടം, ഭരതനാട്യം, കുച്ചുപ്പുടി, തായമ്പക, പഞ്ചവാദ്യത്തിലെ തിമില, മദ്ദളം, ഇടക്ക, ഇലത്താളം, കൊമ്പ് എന്നീ കലാവിഭാഗങ്ങളിൽ പ്രാവീണ്യം തെളിയിച്ച കലാകാരന്മാരെയും ആണ് കലാസാഗർ പുരസ്‌കാരം നൽകി ആദരിക്കുന്നത്. 40നും 70നും ഇടയ്ക്കു പ്രായമുള്ളവരും കേരളത്തിൽ സ്ഥിരതാമസമാക്കിയ കലാകാരന്മാരും ആയിരിക്കണം. നാമനിർദ്ദേശം ഏപ്രിൽ 28നു മുമ്പ് സെക്രട്ടറി, കലാസാഗർ, കവളപ്പാറ, ഷൊർണ്ണൂർ, പാലക്കാട് 679523 എന്ന വിലാസത്തിലാണ് അയക്കേണ്ടത്.
ആ പരമാചാര്യന്റെ 98)o ജന്മവാര്ഷികം ധന്യമായ ഒരു പിറന്നാളിന്റെ ഓര്മ്മ 2022 മെയ് 28നു നോർത്ത് പറവൂർ കളിയരങ്ങിന്റെ സഹകരണത്തോടെ വെളുത്താട്ട് ഭഗവതി ക്ഷേത്രത്തിലെ ഹാളിൽ വെച്ച് കലാസാഗർ ആഘോഷിക്കുന്നു. പുരസ്‌കാരങ്ങൾ തദവസരത്തിൽ സമർപ്പിക്കുന്നതാണ്.
