ദോഹ : പ്രവാസി മാധ്യമപ്രവർത്തകനും ഗ്രന്ഥകാരനുമായ ഡോ. അമാനുല്ല വടക്കാങ്ങരക്ക് യൂണിവേർസൽ റിക്കോർഡ് ഫോറത്തിന്റെ ലൈഫ് ടൈം അച്ചീവ്‌മെന്റ് അവാർഡ്. ഗ്രന്ഥ രചന, മാധ്യമം പ്രവർത്തനം എന്നിവക്ക് പുറമേ ആയിരക്കണക്കിന് ഇന്ത്യക്കാർക്ക് ഗൾഫ് മേഖലയിൽ തൊഴിൽ നേടുവാൻ സഹായകമായ സ്‌പോക്കൺ അറബിക് പുസ്തകങ്ങളും പരിശീലന പരിപാടികളും, വിജയമന്ത്രങ്ങൾ എന്ന മോട്ടിവേഷണൽ പരമ്പര, സാമൂഹ്യ പ്രതിബദ്ധത അടയാളപ്പെടുത്തുന്ന വൈവിധ്യമാർന്ന പരിപാടികൾ എന്നിവയാണ് അമാനുല്ലയെ അവാർഡിനർഹനാക്കിയതെന്ന് യു.ആർ.എഫ് ചീഫ് എഡിറ്റർ ഡോ. സുനിൽ ജോസഫ് അറിയിച്ചു.
മാർച്ച് 5ന് കൊൽക്കത്ത മാരിയറ്റ് ഹോട്ടലിൽ നടക്കുന്ന യു.ആർ.എഫ് വേൾഡ് ടാലന്റ് ഫെസ്റ്റിവലിൽ വെച്ച് അവാർഡ് സമ്മാനിക്കും.കഴിഞ്ഞ മൂന്ന് പതിറ്റാണ്ടോളമായി പ്രവാസ ലോകത്ത് സജീവമായ ഡോ. അമാനുല്ല വടക്കാങ്ങര മലയാളം, ഇംഗ്‌ളീഷ്, അറബി ഭാഷകളിൽ എഴുതുന്ന മാധ്യമ പ്രവർത്തകനാണ്. 80 പുസ്തകങ്ങളുടെ രചയിതാവായ അദ്ദേഹത്തിന്റെ ആയിരത്തിലധികം ലേഖനങ്ങൾ, ഇന്റർവ്യൂകൾ, ഫീച്ചറുകൾ എന്നിവയും പ്രസിദ്ധീകരിച്ചിട്ടുണ്ട്.
കോവിഡ് കാലം സൃഷ്ടിച്ച അനിശ്ചിതത്വത്തിന്റേയയും അസമാധാനത്തിന്റേയും അന്തരീക്ഷത്തിൽ അമാനുല്ലയുടെ രചനയിൽ പിറന്ന വിജയമന്ത്രങ്ങൾക്ക് മികച്ച മലയാളം പോഡ്കാസ്റ്റിനുള്ള യൂണിവേർസൽ റിക്കോർഡ് ഫോറത്തിന്റെ അംഗീകാരം ലഭിച്ചിട്ടുണ്ട്.
മലപ്പുറം ജില്ലയിലെ വടക്കാങ്ങര പരേതരായ മുഹമ്മദ് കുഞ്ഞിപ്പയുടേയും ഹലീമയുടേയും മകനായ അമാനുല്ല ഇപ്പോൾ ഖത്തറിലെ പ്രമുഖ മീഡിയ സ്ഥാപനമായ മീഡിയ പ്‌ളസ് സിഇഒയാണ്.റഷീദയാണ് ഭാര്യ. റഷാദ് മുബാറക്, ഹംദ, സഅദ് എന്നിവർ മക്കളാണ്
