അഭിപ്രായഭിന്നത; മേയർ ആര്യാ രാജേന്ദ്രന്റെ പി.എ. സ്ഥാനമൊഴിഞ്ഞു

തിരുവനന്തപുരം: മേയർ ആര്യാ രാജേന്ദ്രന്റെ പേഴ്സണൽ അസിസ്റ്റന്റായി പ്രവർത്തിച്ചിരുന്ന ഉദ്യോഗസ്ഥൻ സ്ഥാനമൊഴിഞ്ഞു. മേയറുമായുള്ള അഭിപ്രായഭിന്നതയാണ് സ്ഥാനം ഒഴിയാൻ കാരണമെന്നറിയുന്നു. ഒരു വർഷത്തെ ഡെപ്യൂട്ടേഷൻ കാലാവധി അവസാനിച്ചെങ്കിലും പുതുക്കാതെ മാതൃവകുപ്പിലേക്ക് മടങ്ങുകയായിരുന്നു.

ഗസറ്റഡ് ഓഫീസർ റാങ്കിലുള്ള ഉദ്യോഗസ്ഥനായിരുന്നു പേഴ്സണൽ അസിസ്റ്റന്റ്. നികുതി തട്ടിപ്പ് ആരോപണത്തിൽ കോർപ്പറേഷൻ ആസ്ഥാനത്ത് പ്രതിപക്ഷ കക്ഷികളുടെ സമരം നടക്കുന്നതിനിടെ വിനോദയാത്ര പോയെന്ന കാരണം പറഞ്ഞ് പി.എ.യെ മാറ്റണമെന്ന് മേയർ നേരത്തെ ആവശ്യപ്പെട്ടിരുന്നു.

എന്നാൽ, സർക്കാർ ഇതിന് വഴങ്ങിയില്ല. ഉദ്യോഗസ്ഥൻ അംഗമായുള്ള ഇടതുപക്ഷ സംഘടനയും ഇതിനെതിരേ രംഗത്തെത്തി. തുടർന്നുണ്ടായ അഭിപ്രായവ്യത്യാസമാണ് പി.എ. സ്ഥാനമൊഴിയാൻ കാരണമെന്നറിയുന്നു.