ജമ്മു കശ്മീരിൽ ലഷ്‌കർ ഭീകരർ അറസ്റ്റിൽ; ആയുധ ശേഖരം പിടിച്ചെടുത്തു

ശ്രീനഗർ: ജമ്മു കശ്മീരിൽ മൂന്ന് ഭീകരർ അറസ്റ്റിൽ. ലഷ്‌കർ ഇ ത്വയ്ബ ഭീകരരായ ഇഷ്ഫാഖ് അഹമ്മദ് ദർ, നദീം റാഫിക്, റൗഫ് മുസ്താക് എന്നിവരാണ് അറസ്റ്റിലായത്. ജമ്മു കശ്മീർ പൊലീസും സുരക്ഷാസേനയും സംയുക്തമായാണ് മൂന്ന് പേരെയും പിടികൂടിയത്.

ഷോപിയാൻ ജില്ലയിൽ നിന്നുമാണ് ഇവർ പിടിയിലായത്. പൊലീസുമായി ചേർന്ന് സുരക്ഷാ സേന കുന്ദ്പോര മേഖലയിൽ പട്രോളിങ് നടത്തുകയായിരുന്നു. ഇതിനിടെയാണ് മൂന്ന് പേരെയും കണ്ടത്. സംശയാസ്പദമായ സാഹചര്യത്തിൽ കണ്ട ഇവരെ സുരക്ഷാ സേന അടുത്തേക്ക് വിളിച്ചെങ്കിലും മൂന്ന് പേരും കടന്ന് കളയാൻ ശ്രമിക്കുകയായിരുന്നു. എന്നാൽ സുരക്ഷാ സേന ഇവരെ ഓടിച്ചിട്ട് പിടികൂടി. തുടർന്ന് നടത്തിയ ചോദ്യം ചെയ്യലിലാണ് ലഷ്‌കർ ഇ ത്വയ്ബയിൽ ചേർന്ന് പ്രവർത്തിക്കുന്നവരാണെന്ന് വ്യക്തമായത്.

ഇവരുടെ പക്കൽ നിന്നും ആയുധങ്ങൾ പിടിച്ചെടുത്തിട്ടുണ്ട്. പിസ്റ്റലുകൾ, മാഗസീനുകൾ, ഗ്രനേഡുകൾ, വെടിയുണ്ടകൾ എന്നിവയാണ് പിടിച്ചെടുത്തത്. സംഭവത്തിൽ അന്വേഷണം ആരംഭിച്ചു.