'സങ്കടങ്ങൾ ചേർത്തുവയ്ക്കുമ്പോഴും പ്രണയമുണ്ടാവുമെന്നത് മനസ്സിലായത് നിന്നോട് മിണ്ടിത്തുടങ്ങിയ ശേഷമാണ്..'; ബഷീറിന്റെ വാക്കുകൾ കടമെടുത്തു ആര്യാ രാജേന്ദ്രൻ; വിവാഹത്തിലെത്തിയത് ബാലസംഘം കാലത്തു തുടങ്ങിയ പരിചയം

തിരുവനന്തപുരം: മേയർ ആര്യ രാജേന്ദ്രനും ബാലുശേരി എംഎൽഎ സച്ചിൻദേവും തമ്മിലുള്ള വിവാഹനിശ്ചയം ഇന്ന് കഴിഞ്ഞിരുന്നു. ഇന്നു രാവിലെ 11ന് തിരുവനന്തപുരം എ.കെ.ജി സെന്ററിലായിരുന്നു ആര്യയുടെയും സച്ചിന്റെയും വിവാഹനിശ്ചയ ചടങ്ങ്. അടുത്ത ബന്ധുക്കളുടെയും പാർട്ടിയിലെ മുതിർന്ന നേതാക്കളുടെയും സാന്നിധ്യത്തിൽ ഇരുവരും പരസ്പരം മോതിരം കൈമാറി.

വിവാഹനിശ്ചയത്തിനു പിന്നാലെ ബാലുശ്ശേരി എംഎ‍ൽഎ സച്ചിൻദേവിനൊപ്പമുള്ള ചിത്രം ഫേസ്‌ബുക്കിൽ പങ്കുവച്ചിരിക്കുകയാണ് തിരുവനന്തപുരം മേയർ. ലളിതമായ പ്രണയസത്യങ്ങൾ അതിലളിതമായ ഭാഷയിൽ ലോകത്തിനു പകർന്നുനൽകിയ ബേപ്പൂർ സുൽത്താൻ വൈക്കം മുഹമ്മദ് ബഷീറിന്റെ വാക്കുകൾ കടമെടുത്തു തന്നെയാണ് തുടക്കം. ''സങ്കടങ്ങൾ ചേർത്തുവയ്ക്കുമ്പോഴും പ്രണയമുണ്ടാവുമെന്നത് മനസ്സിലായത് നിന്നോട് മിണ്ടിത്തുടങ്ങിയ ശേഷമാണ്..'' എന്ന ബഷീറിന്റെ വാക്കുകൾ ചേർത്താണ് ആര്യ നിശ്ചയചടങ്ങിന്റെ ചിത്രം പങ്കിട്ടിരിക്കുന്നത്.

രാജ്യത്തെ ഏറ്റവും പ്രായം കുറഞ്ഞ മേയറും കേരള നിയമസഭയിലെ പ്രായം കുറഞ്ഞ എംഎ‍ൽഎയും തമ്മിലുള്ള വിവാഹനിശ്ചയമാണ് ഇന്ന് നടന്നത്. വിവാഹം പിന്നീട് നടക്കും. എസ്.എഫ്.ഐ സംസ്ഥാന സെക്രട്ടറിയും പാർട്ടി കോഴിക്കോട് ജില്ലാ കമ്മിറ്റി അംഗവുമാണ് സച്ചിൻ. എസ്.എഫ്.ഐ സംസ്ഥാന സമിതി അംഗവും പാർട്ടി ചാല ഏരിയാ കമ്മിറ്റി അംഗവുമാണ് ആര്യ രാജേന്ദ്രൻ.

ബാലസംഘം കാലം മുതലുള്ള പരിചയമാണ് വിവാഹത്തിലെത്തിയത്. ബാലസംഘം, എസ്.എഫ്.ഐ പ്രവർത്തനകാലത്ത് തന്നെ ഇരുവരും സുഹൃത്തുക്കളായിരുന്നു. ഇരുപത്തിയേഴാം വയസിലാണ് സച്ചിൻ നിയമസഭയിലെത്തിയത്. ബാലുശ്ശേരിയിൽ യു.ഡി.എഫ് മത്സരത്തിനിറക്കിയ ചലച്ചിത്രതാരം ധർമജൻ ബോൾഗാട്ടിയെ തോൽപിച്ചായിരുന്നു സച്ചിന്റെ വരവ്.

ഫെബ്രുവരി 16 നായിരുന്നു ഇരുവരുടേയും വിവാഹ വാർത്തകൾ പുറത്തു വന്നത്. വിവാഹം സംബന്ധിച്ച് ഇരു കുടുംബങ്ങളും തമ്മിൽ ധാരണയായതായി ആര്യയും സച്ചിനും സ്ഥിരീകരിച്ചിരുന്നു.

2021 നിയമസഭാ തിരഞ്ഞെടുപ്പിൽ ബാലുശേരിയിൽ നിന്നാണ് സിച്ചിൻ ദേവ് വിജയിച്ചത്. എസ്എഫ്‌ഐ സംസ്ഥാന സെക്രട്ടറിയായിരിക്കെയായിരുന്നു നിയമസഭയിലേക്ക് തിരഞ്ഞെടുക്കപ്പെട്ടത്. നിലവിൽ എസ്എഫ്‌ഐയുടെ അഖിലേന്ത്യ ജോയിന്റ് സെക്രട്ടറിയാണ് സച്ചിൻ.