പാക്കിസ്ഥാൻ ഡ്രോൺ ഇന്ത്യ വെടിവച്ചുവീഴ്‌ത്തി; ചെറിയ ബാഗ് കണ്ടെടുത്തു; കള്ളക്കടത്ത് നടത്താനുള്ള ശ്രമമെന്ന് ബി എസ് എഫ്

ന്യൂഡൽഹി: ഇന്ത്യൻ അതിർത്തിയിൽ പാക്കിസ്ഥാൻ ഡ്രോൺ അതിർത്തി രക്ഷാസേനയായ ബിഎസ്എഫ് വെടിവച്ചു വീഴ്‌ത്തി. ഡ്രോൺ വഴി കള്ളക്കടത്ത് നടത്താനുള്ള ശ്രമമാണ് നടന്നതെന്ന് സംശയിക്കുന്നതായി ബിഎസ്എഫ് അറിയിച്ചു.

പഞ്ചാബിലെ ഫിറോസ്പൂർ സെക്ടറിൽ പുലർച്ചെ മൂന്ന് മണിയോടെയാണ് സംഭവം. എന്തൊ പറക്കുന്നതായുള്ള മൂളൽ ശബ്ദം കേട്ട് പരിശോധിച്ചപ്പോഴാണ് പാക്കിസ്ഥാൻ ഭാഗത്ത് നിന്ന് ഇന്ത്യൻ ഭാഗത്തേയ്ക്ക് അതിർത്തി കടന്ന് ഡ്രോൺ പറക്കുന്നത് ബിഎസ്എഫിന്റെ ശ്രദ്ധയിൽപ്പെട്ടത്.

ഉടൻ തന്നെ വെടിവച്ചിടാൻ സൈനികർക്ക് നിർദ്ദേശം നൽകുകയായിരുന്നു. ഡ്രോണിൽ നിന്ന് ചെറിയ ബാഗ് കണ്ടെടുത്തു. ഇതിൽ അഞ്ചു പാക്കറ്റുകൾ ഒളിപ്പിച്ചിരുന്നതായി ബിഎസ്എഫ് അറിയിച്ചു. കള്ളക്കടത്തെന്ന് സംശയിക്കുന്നതായി ബിഎസ്എഫ് അറിയിച്ചു.

കള്ളക്കടത്ത് സാധനങ്ങൾ അതിർത്തി കടത്താനുള്ള ശ്രമമാണ് നടന്നതെന്ന് സംശയിക്കുന്നു. പാക്കറ്റുകൾക്ക് ഒന്നാകെ നാലര കിലോഗ്രാം ഭാരം ഉണ്ട്. മഞ്ഞ, കറുപ്പ് നിറത്തിലുള്ളതാണ് പാക്കറ്റുകൾ.