ആലപ്പുഴ: എറണാകുളത്തിനും കോട്ടയത്തിനുമിടെ ട്രാക്കിൽ അറ്റകുറ്റപ്പണിയായതിനാൽ കോട്ടയം വഴി പോകേണ്ട ട്രെയിനുകൾ ആലപ്പുഴ വഴി തിരിച്ചുവിടും. ശബരി എക്സ്പ്രസ് (17230), പരശുറാം എക്സ്പ്രസ് (16649),കോർബ-കൊച്ചുവേളി സൂപ്പർഫാസ്റ്റ് (22647), കൊച്ചുവേളി -ലോകമാന്യതിലക് ഗരീബ് രഥ് (12202) എന്നീ ട്രെയിനുകളാണ് വഴി തിരിച്ചുവിടുന്നത്.

ശബരി എക്സ്പ്രസ് 14, 19, 22 തീയതികളിൽ കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂർ, മാവേലിക്കര, എന്നീ സ്റ്റോപ്പുകൾ ഒഴിവാക്കും. പകരം എറണാകുളം ജങ്ഷൻ, ചേർത്തല, ആലപ്പുഴ, അമ്പലപ്പുഴ, ഹരിപ്പാട് എന്നീ സ്റ്റോപ്പുകളിൽ നിർത്തും. ഇതേ ദിവസങ്ങളിൽ പരശുറാം എക്സ്പ്രസ് തൃപ്പൂണിത്തുറ, പിറവം റോഡ്, ഏറ്റുമാനൂർ, കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂർ, മാവേലിക്കര സ്റ്റോപ്പുകൾ ഒഴിവാക്കും. പകരം എറണാകുളം ജങ്ഷൻ, ചേർത്തല, ആലപ്പുഴ, അമ്പലപ്പുഴ, ഹരിപ്പാട് എന്നിവിടങ്ങളിൽ നിർത്തും.

കോർബ -കൊച്ചുവേളി സൂപ്പർഫാസ്റ്റ് 14ന് ആലപ്പുഴ വഴിയാണ് സർവീസ്. തൃപ്പൂണിത്തുറ, കോട്ടയം, തിരുവല്ല, ചെങ്ങന്നൂർ, മാവേലിക്കര സ്റ്റോപ്പുകൾ ഒഴിവാക്കും. എറണാകുളം ജങ്ഷൻ, ചേർത്തല, ആലപ്പുഴ, അമ്പലപ്പുഴ, ഹരിപ്പാട് എന്നിവിടങ്ങളിലാണ് സ്റ്റോപ്പ്. കൊച്ചുവേളി- ലോകമാന്യതിലക് ഗരീബ്രഥ് ഞായറാഴ്ച ചെങ്ങന്നൂർ, തിരുവല്ല, കോട്ടയം എന്നീ സ്റ്റോപ്പുകൾ ഒഴിവാക്കി ആലപ്പുഴയിലും എറണാകുളം ജങ്ഷനിലും നിർത്തും. റെയിൽവേ അധികൃതർ പറഞ്ഞു.