തെക്കുകിഴക്കേ ഏഷ്യയിലും യൂറോപ്പിലും കോവിഡ് കേസുകൾ ഉയരുന്നു; കോവിഡ് പ്രതിരോധം ശക്തമായി തുടരണമെന്ന് സംസ്ഥാനങ്ങൾക്ക് കേന്ദ്ര നിർദ്ദേശം

ന്യൂഡൽഹി: തെക്കുകിഴക്കേ ഏഷ്യയിലും യൂറോപ്പിലും കോവിഡ് കേസുകൾ വീണ്ടും ഉയരുന്ന സാഹചര്യത്തിൽ ജാഗ്രത പാലിക്കാൻ സംസ്ഥാനങ്ങൾക്ക് നിർദ്ദേശം നൽകി കേന്ദ്ര സർക്കാർ. പുതിയ വകഭേദങ്ങൾ സമയബന്ധിതമായി കണ്ടെത്തുന്നതിന് സാമ്പിളുകളുടെ പരിശോധന ഉറപ്പാക്കുകയും വാക്സിൻ വിതരണം ശക്തമാക്കുകയും ചെയ്യണമെന്നാണ് നിർദ്ദേശം.

കോവിഡ് പ്രതിരോധത്തിൽ വീഴ്ചവരുത്തരുതെന്നും പരിശോധന, സാമൂഹ്യാകലം, ചികിത്സ, വാക്സിനേഷൻ എന്നീ പ്രതിരോധ മാർഗങ്ങൾ തുടരണമെന്നും കേന്ദ്ര ആരോഗ്യ സെക്രട്ടറി രാജേഷ് ഭൂഷൺ സംസ്ഥാനങ്ങൾക്ക് അയച്ച കത്തിൽ ആവശ്യപ്പെട്ടു.

പുതിയ കേസുകൾ വർധിച്ച് ക്ലസ്റ്ററുകൾ രൂപപ്പെടുന്നത് സംബന്ധിച്ച് നിരീക്ഷണം കാര്യക്ഷമമാക്കണം. രോഗവ്യാപനം തടയുന്നതിന് ആരോഗ്യമന്ത്രാലയത്തിന്റെ മുന്നറിയിപ്പുകൾ പ്രകാരമുള്ള നടപടികൾ കൈക്കൊള്ളണമെന്നും നിർദേശത്തിൽ പറയുന്നു.

ചൈനയുൾപ്പെടെ ചില രാജ്യങ്ങളിൽ കോവിഡ്ബാധ കുതിച്ചുയരുന്ന പശ്ചാത്തലത്തിലാണ് ജാഗ്രത തുടരാൻ സംസ്ഥാനങ്ങളോട് കേന്ദ്രം നിർദ്ദേശം നൽകിയിരിക്കുന്നത്. കഴിഞ്ഞ ദിവസം കോവിഡ് സ്ഥിതിഗതികൾ വിലയിരുത്താൻ ആരോഗ്യമന്ത്രി മൻസുഖ് മാണ്ഡവ്യയുടെ അധ്യക്ഷതയിൽ ചേർന്ന ഉന്നതതലയോഗത്തിൽ സംസ്ഥാനങ്ങൾക്ക് ഇതു സംബന്ധിച്ച് മുന്നറിയിപ്പ് നൽകിയിരുന്നു.

ചൈന, ദക്ഷിണകൊറിയ, സിങ്കപ്പൂർ തുടങ്ങിയ രാജ്യങ്ങളിലാണ് കോവിഡ് കേസുകൾ ഉയരുന്നത്. ചൈനയിൽ ചൊവ്വാഴ്ച പ്രതിദിനരോഗികൾ 5000 കടന്നു. ബുധനാഴ്ച 3290 പേർകൂടി രോഗബാധിതരായി. ഒമിക്രോണിന്റെ ഉപവകഭേദമാണ് മുഖ്യമായി പടരുന്നത്.