രണ്ടാം ഭാര്യ കാണാൻ വിസമ്മതിച്ചു; എടപ്പാൾ പാലത്തിന് മുകളിൽ നിന്ന് യുവാവിന്റെ ആത്മഹത്യാ ഭീഷണി; പരിഭ്രാന്തി പരത്തിയത് മണിക്കൂറുകളോളം

മലപ്പുറം: പിണങ്ങി കഴിയുന്ന രണ്ടാം ഭാര്യയെ കാണാനെത്തിയയാൾ പാലത്തിന് മുകളിൽ നിന്നും ചാടി ആത്മഹത്യാ ഭീഷണിയുയർത്തിയത് മണിക്കൂറുകളോളം. ഇതോടെ ജനം പരിഭ്രാന്തരായി. എടപ്പാൾ മേൽപ്പാലത്തിന് മുകളിൽ ഇന്ന് വൈകീട്ടോടെയാണ് സംഭവം നടന്നത്.

തിരൂരിലെ സ്വകാര്യ ആശുപത്രിയിൽ ജോലി ചെയ്യുന്ന രണ്ടാം ഭാര്യയെ കാണാനെത്തിയ ഇടുക്കി സ്വദേശിയായ യുവാവാണ് മദ്യപിച്ചെത്തി ഭീതി ഉയർത്തിയത്. ഭാര്യ കാണാൻ വിസമ്മതിച്ചതിനെ തുടർന്ന് തിരൂരിൽ നിന്നും എടപ്പാളിലെത്തിയ ഇയാൾ കുറ്റിപ്പുറം കോഴിക്കോട് റോഡിൽ ഗതാഗതം തടസ്സപ്പെടുത്തി. ഇവിടെ നിന്നും മാറ്റാനുള്ള ശ്രമങ്ങൾ ഹോംഗാർഡിന്റെ നേതൃത്വത്തിൽ നടത്തിയെങ്കിലും പരാജയപെട്ടു.

തുടർന്ന് എടപ്പാൾ ടൗണിലെത്തിയ ഇയാൾ മേൽപ്പാലത്തിന് മുകളിൽ കയറുകയും താഴെക്ക് ചാടാൻ ശ്രമിക്കുകയുമായിരുന്നു. നാട്ടുകാരും ടാക്സി ഡ്രൈവർമാരും ചേർന്ന് ഇയാളെ പിടിച്ച് നിർത്തി. ഇതോടെ എടപ്പാളിൽ ഗതാഗത കുരുക്ക് രൂക്ഷമായി. വിവരമറിയിച്ചതിനെ തുടർന്ന് ചങ്ങരംകുളം എസ്‌ഐ വിജയകുമാരന്റെ നേതൃത്വത്തിലുള്ള പൊലീസ് സംഘം സ്ഥലത്തെത്തി ഇയാളെ സ്റ്റേഷനിലേക്ക് മാറ്റി. യുവാവിന്റെ ബന്ധുക്കളെ വിളിച്ച് വരുത്തി അവർക്കൊപ്പം വിടും