മഹാ വികാസ് അഘാഡി സർക്കാർ കാലാവധി പൂർത്തിയാക്കും; അധികാരം നിലനിർത്തുമെന്നും സഞ്ജയ് റാവത്ത്

മുംബൈ: മഹാരാഷ്ട്രയിലെ മഹാവികാസ് അഘാഡി സർക്കാർ കാലാവധി പൂർത്തിയാക്കി 2024 ലെ അടുത്ത നിയമസഭാ തിരഞ്ഞെടുപ്പിൽ അധികാരം നിലനിർത്തുമെന്ന് ശിവസേന എംപി സഞ്ജയ് റാവത്ത്.

അടുത്ത തിരഞ്ഞെടുപ്പിൽ ഗോവയിലെന്നപോലെ മഹാരാഷ്ട്രയിലും ബിജെപി ഒറ്റയ്ക്ക് അധികാരത്തിലെത്തുമെന്ന് മുൻ മുഖ്യമന്ത്രി ദേവേന്ദ്ര ഫഡ്‌നാവിസ് പറഞ്ഞതിന് തൊട്ടുപിന്നാലെയാണ് റൗത്തിന്റെ പ്രസ്താവന.

ഉദ്ധവ് താക്കറെ സർക്കാർ രണ്ടര വർഷം പൂർത്തിയാക്കി. ഇനി രണ്ടര വർഷം കൂടി കടന്നുപോകും. തിരഞ്ഞെടുപ്പ് വീണ്ടും നടക്കും ഞങ്ങൾ അധികാരം നിലനിർത്തുമെന്നും റൗത്ത് മാധ്യമപ്രവർത്തകരോട് പറഞ്ഞു.

ഗോവ നിയമസഭാ തെരഞ്ഞെടുപ്പിന്റെ ബിജെപിയുടെ ചുമതല ഫഡ്‌നാവിസായിരുന്നുവെന്നും എന്നാൽ ഗോവ എന്താണെന്ന് ഫഡ്‌നാവിസ് ഉടൻ അറിയുമെന്നും ശിവസേന നേതാവ് പറഞ്ഞു.

പോർച്ചുഗീസുകാരും ബ്രിട്ടീഷുകാരും പോലും ഗോവയെ മനസ്സിലാക്കിയിരുന്നില്ല. പല രാഷ്ട്രീയ പാർട്ടികൾക്കും ഇത് മനസ്സിലാക്കാൻ കഴിഞ്ഞില്ലെന്നും അദ്ദേഹം ചൂണ്ടിക്കാട്ടി.