പുന്നയൂർക്കുളം: പുന്നയൂർക്കുളം സാഹിത്യ സമിതി വാർഷികം കമലാ സുരയ്യ സമുച്ചയത്തിൽ മാർച്ച് 20-ന് നോവലിസ്റ്റ് ടി.ഡി. രാമകൃഷ്ണൻ ഉദ്ഘാടനം ചെയ്തു. സമിതി പ്രസിഡന്റ് അബ്ദുൽ പുന്നയൂർക്കുളം അദ്ധ്യക്ഷത വഹിച്ചു.
നാലപ്പാട്ടെ കാവും, കുളവും, നീർമാതളത്തണലും, വിശാലമായ സമുച്ചയവും ഉൾക്കൊള്ളുന്ന കമലാ സുരയ്യ സ്മാരകം സഗാത്മക പ്രവർത്തനങ്ങളുടെ നിരന്തര വേദിയാക്കാൻ പ്രാദേശിക സംവിധാനമൊരുക്കുമെന്ന് സാഹിത്യ അക്കാദമി ഉപാദ്ധ്യക്ഷൻ അശോകൻ ചരുവിൽ പറഞ്ഞു. വാർഷിക സമ്മേളനത്തിൽ മുഖ്യ പ്രഭാഷണം നടത്തുകയായിരുന്നു അദ്ദേഹം.
പുന്നയൂർക്കുളത്തിന്റെ പ്രകൃതിയും മണ്ണും മനുഷ്യരുമാണ് മാധവിക്കുട്ടിയെ വ്യവസ്ഥിതിയെ വെല്ലുവിളിച്ച എഴുത്തുകാരിയാക്കിയതെന്ന് ഉദ്ഘാടനം നിർവ്വഹിച്ച നോവലിസ്റ്റ് ടി.ഡി. രാമകൃഷ്ണൻ അഭിപ്രായപ്പെട്ടു.
ഡോ. ഖദീജ മുംതാസ്, പഞ്ചായത്ത് പ്രസിഡന്റ് ജാസ്മിൻ ഷഹീർ, സ്മരണ ചാരിറ്റി ട്രസ്റ്റ് ചെയർമാൻ സി.പി. സുന്ദരേശൻ, കുന്നത്തൂർ റസിഡന്റ് അസ്സോസിയേഷൻ പ്രസിഡന്റ് പി. ഗോപാലൻ, പ്രിയദർശിനി കൾച്ചറൽ ഫോറം സെക്രട്ടറി അശ്കർ അറയ്ക്കൽ, നാലപ്പാടൻ സാംസ്കാരിക സമിതി കൺവീനർ സരിത നാലപ്പാട്ട് എന്നിവർ സംസാരിച്ചു. രാജേഷ് കടാമ്പുള്ളി സ്വാഗതവും, സി. ദിനേശൻ നന്ദിയും പറഞ്ഞു.
ബൈജു കുമാറിന്റെ 'പ്രകൃതി' ചിത്രപ്രദർശനം ഉമ്മർ അറയ്ക്കൽ ഉദ്ഘാടനം ചെയ്തു. തിയ്യേറ്റർ റൈഡേഴ്‌സിന്റെ 'മാണിക്യ മൂക്കുത്തി' എന്ന നാടകവും അരങ്ങേറി.
