വാടകയ്ക്കു കൊടുത്ത കെട്ടിടത്തിൽ പെൺവാണിഭ സംഘം പിടിയിലായി; ഉടമയ്ക്കെതിരെ കേസെടുക്കാനാവില്ലെന്ന് ഹൈക്കോടതി

ബംഗളൂരു: വാടകയ്ക്കു കൊടുത്ത കെട്ടിടത്തിൽ പെൺവാണിഭ സംഘം പിടിയിലായ സംഭവത്തിൽ ഉടയ്ക്കെതിരെ കേസെടുക്കാനാവില്ലെന്ന് കർണാടക ഹൈക്കോടതി. ഉടമയുടെ അറിവോടെയാണ് സംഘത്തിന്റെ പ്രവർത്തനം എന്നുണ്ടെങ്കിൽ മാത്രമേ കേസ് നിലനിൽക്കൂവെന്ന് ജസ്റ്റിസ് എം നാഗപ്രസന്ന വ്യക്തമാക്കി.

2019 ഡിസംബറിലാണ് ഉടമ കെട്ടിടം വാടകയ്ക്കു നൽകിയത്. ജനുവരിയിൽ പൊലീസ് ഇവിടെ റെയ്ഡ് നടത്തി പെൺവാണിഭ സംഘത്തെ അറസ്റ്റ് ചെയ്തു. കേസിൽ തന്നെയും പ്രതി ചേർത്തതിന് എതിരെ ഉടമ നൽകിയ ഹർജിയിലാണ് ഹൈക്കോടതി ഉത്തരവ്.

മനുഷ്യക്കടത്ത് നിരോധന നിയമത്തിന്റെ 3 (രണ്ട്) ബി വകുപ്പ് അനുസരിച്ച് ഉടമയുടെ അറിവോടെ സംഘം പ്രവർത്തിച്ചെങ്കിൽ മാത്രമേ കേസെടുക്കാനാവൂ എന്ന് കോടതി ചൂണ്ടിക്കാട്ടി. ഇവിടെ ഉടമ ഈ കെട്ടിടത്തിൽ താമസിക്കുന്നില്ല. മറ്റൊരിടത്തു താമസിക്കുന്ന ഉടമയ്ക്ക് ഇവിടെ നടന്ന കാര്യങ്ങൾ അറിയണമെന്നില്ല. ഇക്കാര്യം പൊലീസ് തന്നെ എഫ്ഐആറിൽ വ്യക്തമാക്കിയിട്ടുണ്ട്. അതുകൊണ്ട് ഉടമയ്ക്കെതിരെ കേസെടുത്തത് നിയമത്തിന്റെ ദുരുപയോഗമായേ കാണാനാവൂ എന്ന് കോടതി വിമർശിച്ചു