സൗജന്യ ഭക്ഷ്യധാന്യ പദ്ധതി ആറുമാസത്തേക്ക് കൂടി നീട്ടി; തീരുമാനം കേന്ദ്രമന്ത്രിസഭായോഗത്തിൽ

ന്യൂഡൽഹി: കോവിഡ് കാലത്ത് കേന്ദ്ര സർക്കാർ നടപ്പിലാക്കിയ സൗജന്യ ഭക്ഷ്യധാന്യ പദ്ധതി ആറ് മാസത്തേക്ക് കൂടി ദീർഘിപ്പിക്കാൻ തീരുമാനം. മാർച്ച് 31ന് പദ്ധതിയുടെ കാലാവധി തീരാനിരിക്കെയാണ്
കേന്ദ്ര മന്ത്രിസഭാ യോഗം ഇക്കാര്യം തീരുമാനിച്ചത്.

പ്രധാനമന്ത്രി ഗരീബ് കല്യാൺ യോജന എന്ന പേരിൽ 2020 മാർച്ചിലാണ് സൗജന്യ ഭക്ഷ്യധാന്യ പദ്ധതി ആരംഭിച്ചത്. ലോക്ഡൗൺ സാഹചര്യം കണക്കിലെടുത്തായിരുന്നു നടപടി. പദ്ധതി പിന്നീട് 2022 മാർച്ച് വരെ നീട്ടുകയായിരുന്നു. ഈ കാലാവധി അവസാനിക്കുന്ന ഘട്ടത്തിലാണ് 2022 സെപ്റ്റംബർ വരെ പദ്ധതി നീട്ടി പുതിയ തീരുമാനം വരുന്നത്.

മുൻഗണനാ വിഭാഗങ്ങളിൽ പെട്ട കുടുംബത്തിലെ ഒരാൾക്ക് 5 കിലോ ഭക്ഷ്യ ധാന്യം വീതമാണ് പ്രധാനമന്ത്രിയുടെ ഗരീബ് കല്യാൺ യോജനയിലൂടെ നൽകുന്നത്. 26000 കോടി രൂപ ചെലവഴിച്ചാണ് പദ്ധതി നടപ്പിലാക്കിയത്.