ദോഹ: എക്‌സ്പാറ്റ് സ്‌പോർട്ടീവിന്റെ ഒരു വർഷം നീണ്ട് നിൽക്കുന്ന ഇന്ത്യൻ ഫാൻസ് ഫിയസ്റ്റയുടെ ഭാഗമായി സംഘടിപ്പിച്ച ഫാൻസ് സെവൻസ് ടൂർണ്ണമെന്റിൽ ബ്രസീൽ ജേതാക്കളായി. മിസൈമീർ ഹാമിൽട്ടൻ ഇന്റർനാഷണൽ സ്‌കൂൾ ഗ്രൗണ്ടിൽ നടന്ന ടൂർണ്ണമെന്റിൽ എതിരില്ലാത്ത ഒരു ഗോളിന് ഡെന്മാർക്കിനെ പരാജയപ്പെടുത്തിയാണ് ബ്രസീൽ കപ്പുയർത്തിയത്.
ലോകകപ്പ് ആരവങ്ങൾക്ക് ആവേശം പകരാൻ ഖത്തറിലേക്ക് ടിക്കറ്റുറപ്പിച്ച ടീമുകളുടെ ഫാൻസുകളാണ് അവരുടെ ജഴ്‌സിയിൽ കലത്തിലിറങ്ങിയത്. സെമി ഫൈനലിൽ ഖത്തറിനെ ഒരു ഗോളിന് പരാജയപ്പെടുത്തി ബ്രസീൽ ഫൈനലിൽ പ്രവേശിച്ചപ്പോൾ പെനാൽട്ടി ഷൂട്ടൗട്ടിലേക്ക് നീണ്ട പോരാട്ടത്തിൽ ജർമനിയെ കീഴടക്കിയാണ് ഡെന്മാർക്ക് കലാശപ്പോരാട്ടത്തിന് യോഗ്യത നേടിയത്.
ടൂർണ്ണമെന്റിലെ മികച്ച കളിക്കാരനായി ബ്രസീലിന്റെ ടോപ്പ് സ്‌കോററായി ഡെന്മാർക്കിന്റെ മികച്ച ഗോൾക്കീപ്പറായി ഡെന്മാർക്കിന്റെ റാഷിദിനെയും തെരഞ്ഞെടുത്തു. ഫാൻസ് ഫിയസ്റ്റ ചെയർമാൻ സുഹൈൽ ശാന്തപുരം ചാമ്പ്യന്മാർക്കുള്ള ട്രോഫിയും നടുമുറ്റം പ്രസിഡണ്ട് സജ്‌ന സാക്കി പ്രൈസ് മണിയും സമ്മാനിച്ചു. ഫാൻസ് ഫിയസ്റ്റ ജനറൽ കൺവീനർ താസീൻ അമീൻ, ഓർഗ്ഗനൈസിങ് കമ്മറ്റിയംഗങ്ങളായ ഷാനവാസ് ഖാലിദ്, മുഹമ്മദ് കുഞ്ഞി, ഷറഫു വടക്കാങ്ങര, മുഹമ്മദ് റാഫി, സാദിഖ് ചെന്നാടൻ, സിദ്ദീഖ് വേങ്ങര, രാധാകൃഷ്ണൻ, റഷീദ് കൊല്ലം, അഹമ്മദ് ഷാഫി, ഷരീഫ് ചിറക്കൽ, അനസ് ജമാൽ തുടങ്ങിയവർ മറ്റ് സമ്മാനങ്ങൾ വിതരണം ചെയ്തു.
നേരത്തെ നൂറുകണക്കിന് പ്രവാസികളെ സാക്ഷിയാക്കി നടന്ന ഉദ്ഘാടന ചടങ്ങിൽ ഖത്തറിന്റെ ഫൂട്ബാൾ ഇതിഹാസ താരങ്ങളും ഫിഫ വേൾഡ് കപ്പ് ഖത്തർ ലെഗസി അമ്പാസഡർമാരുമായ ഖാലിദ് സൽമാൻ അൽ മുഹന്നദി, ഇബ്രാഹീം ഖൽഫാൻ തുടങ്ങിയവരും ഖത്തർ ആഭ്യന്തര മന്ത്രാലയത്തിലെ പ്രമുഖരും ഇന്ത്യൻ എമ്പസിക്ക് കീഴിലെ അപക്‌സ് ബോഡി ഭാരവാഹികളും പങ്കെടുത്തു.
ഫിയസ്റ്റ ഉദ്ഘാടനത്തോടനുബന്ധിച്ച് കാണികൾക്കും കുട്ടികൾക്കും കുടുംബങ്ങൾക്കുമായി നടത്തിയ വിവിധ മത്സരങ്ങളിലെ വിജയികൾക്കുള്ള സമ്മാനദാനവും നടന്നു. ക്രയോൺ കളറിങ്ങിൽ സയാൻ മുഹമ്മദ്, നിരഞ്ചന അനൂപ്, അരുഷ് രമേഷ് എന്നിവരും പെൻസിൽ ഡ്രോയിങ്ങിൽ മുഹമ്മദ് സഫ്വാൻ, സിയ ഫാതിമ റാസിഖ്, ഇഫ്ഫ ഫാതിമ, നാസ്മിൻ, വാട്ടർ കളറിംഗിൽ ഇഷിത ഹരിലാൽ, മുഹമ്മദ് നാസിം, അമൃത എന്നിവരും യഥാക്രമം ആദ്യ മൂന്ന് സ്ഥാനങ്ങൾ കരസ്ഥമാക്കി. ഫോടോഗ്രഫിയിൾ ഇജാസ് അസ്ലം, പ്രിശ ദുധനി എന്നിവർ ജേതാക്കളായി, ഫുട്ബാൾ ജഗ്ലിങ്ങിൽ ആദി, സയാൻ സാക്കി എന്നിവർ ആദ്യ രണ്ട് സ്ഥാനങ്ങൾ നേടി.
