യുഎഇ സന്ദർശനത്തിൽ സ്റ്റാലിൻ ധരിച്ച കോട്ടിന്റെ വില 17 കോടിയെന്ന് വ്യാജപ്രചരണം; യുവമോർച്ച നേതാവ് അറസ്റ്റിൽ

ചെന്നൈ: യുഎഇ സന്ദർശനത്തിനിടെ എം കെ സ്റ്റാലിൻ ധരിച്ചിരുന്ന ജാക്കറ്റിന്റെ വില 17 കോടി രൂപയെന്ന് പ്രചരിപ്പിച്ച യുവമോർച്ച നേതാവ് അറസ്റ്റിൽ. യുവമോർച്ച സേലം വെസ്റ്റ് ജില്ലാ സെക്രട്ടറിയായ എടപ്പാടി സ്വദേശി അരുൾ പ്രസാദിനെയാണ് അറസ്റ്റ് ചെയ്തത്.

ധനമന്ത്രി പളനിവേൽ ത്യാഗരാജനിൽ നിന്ന് ലഭിച്ച വിവരമെന്ന പേരിലാണ് സ്റ്റാലിൻ ധരിച്ച ജാക്കറ്റിന്റെ വിലയെക്കുറിച്ചുള്ള സന്ദേശം സാമൂഹമാധ്യമങ്ങളിൽ പ്രചരിപ്പിച്ചത്. ജാക്കറ്റ് ധരിച്ചുകൊണ്ടുള്ള സ്റ്റാലിന്റെ ചിത്രം സഹിതമായിരുന്നു പ്രചരണം. സംഭവത്തിൽ പൊലീസ് കേസെടുക്കുകയും എടപ്പാടിയിൽ നിന്ന് അരുൾ പ്രസാദിനെ അറസ്റ്റ് ചെയ്യുകയുമായിരുന്നു.

എം കെ സ്റ്റാലിന്റെ യുഎഇ സന്ദർശനം വെറും ഫാമിലി പിക്‌നിക്കാണെന്ന പ്രതിപക്ഷ പാർട്ടിയായ എഐഎഡിഎംകെയുടെ ആരോപണത്തിന് പിന്നാലെയാണ് സന്ദർശനവുമായി ബന്ധപ്പെട്ട് വ്യാജ സന്ദേശം പ്രചരിപ്പിച്ചത്.

സാമൂഹമാധ്യമങ്ങളിൽ വ്യാജപ്രചാരണം നടത്തിയതിന് ജനുവരിയിൽ യുവമോർച്ച സംസ്ഥാന അധ്യക്ഷൻ വിനോജ് പി സെൽവത്തിന്റെ പേരിൽ കേസെടുത്തിരുന്നു. ഡിഎംകെ. അധികാരത്തിലെത്തിയതിനുശേഷം തമിഴ്‌നാട്ടിൽ നൂറിലേറെ ക്ഷേത്രങ്ങൾ തകർത്തുവെന്ന വ്യാജ പ്രചാരണം നടത്തിയതിനായിരുന്നു കേസ്. സാമൂഹമാധ്യമങ്ങളിലൂടെ വ്യാജപ്രചാരണം നടത്തുന്നവർക്കെതിരേ കർശനടപടിയെടുക്കുമെന്ന് തമിഴ്‌നാട് പൊലീസ് മുന്നറിയിപ്പ് നൽകി.