വെള്ളിയാഴ്ച മുതൽ, അതായത് ഏപ്രിൽ 1 മുതൽ ജർമ്മനിയുടെ പല ഭാഗങ്ങളിലും നിരവധി നിയമങ്ങളും നിയന്ത്രണങ്ങളും ഇല്ലാതായിരിക്കുകയാണ്. ഷോപ്പുകളിലോ മ്യൂസിയങ്ങളിലോ റെസ്റ്റോറന്റുകളിലോ സ്‌കൂളുകളിലോ മാസ്‌കുകൾ നിർബന്ധമല്ല എന്നതാണ് പ്രധാന മാറ്റം. എന്നാൽ ബിസിനസ് സംരംഭകർക്ക് അവരുടേതായ മാസ്‌ക് നിയമങ്ങൾ പുറപ്പെടുവിക്കാവുന്നതാണ്.
കൂടാതെ വാക്സിനേഷന്റെ തെളിവോ റെസ്റ്റോറന്റുകളിൽ ഡേ-ഓഫ് ടെസ്റ്റോ ഇല്ല. ചില പൊതുഗതാഗത സംവിധാനങ്ങളും വ്യക്തിഗത ബിസിനസ്സുകളും സ്ഥാപനങ്ങളും മാസ്‌ക് ആവശ്യകതകൾ പാലിക്കുമെങ്കിലും പൊതുസ്ഥലങ്ങളിൽ മാസ്‌ക് നിർബന്ധമല്ല.
ഏപ്രിൽ 2 മുതൽ, രാജ്യവ്യാപകമായി എല്ലാ കൊറോണ വൈറസ് നിയന്ത്രണങ്ങളും - 3G, 2G, 2G പ്ലസ് നിയമങ്ങൾ, കോൺടാക്റ്റ് നിയന്ത്രണങ്ങളും ഇല്ലാതാകും. ഇതിന് പകരമായി ആശുപത്രികളിലും റിട്ടയർമെന്റ് ഹോമുകളിലും പരിശോധന, മാസ്‌ക് നിയമങ്ങൾ, വിമാനങ്ങളിലും ബസുകളിലും ട്രെയിനുകളിലും വിമാനത്താവളങ്ങളിലും സ്റ്റേഷനുകളിലും മാസ്‌ക് ആവശ്യകതകൾ പോലുള്ള ചില ''അടിസ്ഥാന സംരക്ഷണ നടപടികൾ
പാലിക്കേണ്ടതായി വരും.
എന്നിരുന്നാലും, മാസ്‌ക് ആവശ്യകതകൾ, സാമൂഹിക അകലം, 2G, 3G എന്നിവയുൾപ്പെടെയുള്ള ചില നടപടികൾ നിലനിർത്തുന്നതിന് - കൊറോണ വൈറസ് കേസുകൾ കൂടുതലായി നിലനിൽക്കുന്ന മേഖലകളിൽ - 'ഹോട്ട്സ്പോട്ട് റെഗുലേഷൻ' എന്ന് വിളിക്കപ്പെടുന്ന രീതി നടപ്പിലാക്കാനുള്ള ഓപ്ഷൻ ഫെഡറൽ സർക്കാർ സംസ്ഥാന സർക്കാരുകൾക്ക് വിട്ടുകൊടുത്തിട്ടുണ്ട്. ഇതനുസരിച്ച് സംസ്ഥാനങ്ങളിൽ നിയമങ്ങൾ പാലിക്കേണ്ടതായി വരും.
