അബുദാബി: യുഎഇയിൽ നിന്ന് വാക്‌സിനെടുത്തവർക്കും ഇനി ഇന്ത്യയിലേക്ക് വരാൻ പി.സി.ആർ പരിശോധന വേണ്ട. നേരത്തെ ഇന്ത്യയിൽ നിന്ന് രണ്ട് ഡോസ് വാക്‌സിനെടുത്തവർക്ക് മാത്രമായിരുന്നു പി.സി.ആർ പരിശോധനയിൽ ഇളവ് അനുവദിച്ചിരുന്നത്.
വാക്‌സിനേഷൻ സർട്ടിഫിക്കറ്റ് അംഗീകരിച്ച രാജ്യങ്ങളുടെ പട്ടികയിൽ ഇന്ത്യ യുഎഇയെയും ഉൾപ്പെടുത്തിയതോടെയാണ് യുഎഇയിൽ വാക്‌സിനെടുത്തവർക്കും ഇന്ത്യയിലേക്ക് വരാൻ ഇളവ് ലഭിച്ചിരിക്കുന്നത്. യാത്രയ്ക്ക് മുന്നോടിയായി എയർ സുവിധ പോർട്ടലിൽ വാക്‌സിനേഷൻ സർട്ടിഫിക്കറ്റ് അപ്‌ലോഡ് ചെയ്തിരിക്കണം.
അംഗീകൃത രാജ്യങ്ങളിൽ നിന്നുള്ള വാക്‌സിനേഷൻ പൂർത്തിയാക്കിയിട്ടില്ലാത്തവർ യാത്ര പുറപ്പെടുന്ന സമയത്തിന് 72 മണിക്കൂറിനിടെയുള്ള കോവിഡ് പി.സി.ആർ പരിശോധനാ ഫലം ഹാജരാക്കണം. അഞ്ച് വയസിൽ താഴെ പ്രായമുള്ള കുട്ടികളെ പി.സി.ആർ പരിശോധനയിൽ നിന്ന് ഒഴിവാക്കിയിട്ടുണ്ട്. തിരികെ യുഎഇയിലേക്ക് യാത്ര ചെയ്യുനും വാക്‌സിനേഷൻ പൂർത്തിയാക്കിയവർ പി.സി.ആർ പരിശോധനയ്ക്ക് വിധേയമാവേണ്ടതില്ല.
