പ്രമുഖ ഡിജിറ്റൽ ട്രാൻസ്ഫർമേഷൻ സൊല്യൂഷൻസ് കമ്പനിയായ യു.എസ്.ടി തങ്ങളുടെ ജീവനക്കാർക്കായി തിരുവനന്തപുരം കാമ്പസിൽ പുതിയ മൾട്ടി ലെവൽ കാർപാർക്കിങ് സംവിധാനം (എം.എൽ.സി.പി) തുറന്നു. മൾട്ടി ലെവൽ കാർപാർക്കിങ് സംവിധാനത്തിന് 1800 ഫോർ വീലറുകൾ ഉൾക്കൊള്ളാൻ ശേഷിയുണ്ട്. തിരുവനന്തപുരം നഗരത്തിലേയും യു.എസ്.ടിയുടേയും ഏറ്റവും വലിയ പാർക്കിങ് സംവിധാനങ്ങളിൽ ഒന്നാണിത്.

സ്ഥലം വികസിപ്പിച്ചത് അടക്കം 34 മാസം കൊണ്ടാണ് എം.എൽ.സി.പിയുടെ നിർമ്മാണം പൂർത്തിയായത്. രണ്ടു ഘട്ടങ്ങൾ ഉൾപ്പെടുന്ന എം.എൽ.സി.പി പദ്ധതിയുടെ ആദ്യഘട്ടമാണ് ഇപ്പോൾ പൂർത്തിയാക്കിയിരിക്കുന്നത്. രണ്ടാം ഘട്ട വികസനത്തിൽ അഞ്ച് നിലകൾ കൂടി ഉൾപ്പെടുത്തി നാലായിരം കാറുകൾ പാർക്ക് ചെയ്യാനുള്ള സംവിധാനങ്ങളാണ് യു.എസ്.ടി ലക്ഷ്യമിടുന്നത്.

മഹാമാരിയുടെ വെല്ലുവിളികൾ മാറി ജീവനക്കാരെല്ലാം ക്രമേണ ഓഫീസിലേക്ക് മടങ്ങിയെത്തുന്ന സാഹചര്യത്തിൽ അവരുടെ ആവശ്യങ്ങൾ കണക്കിലെടുത്തുകൊണ്ടാണ് ഇത്തരം ഒരു പാർക്കിങ് സംവിധാനം തുടങ്ങിയിരിക്കുന്നതെന്ന് യു.എസ്.ടി തിരുവനന്തപുരം സെന്റർ ഹെഡ് ശിൽപ്പാ മേനോൻ പറഞ്ഞു. ഏറെ വെല്ലുവിളികൾ നിറഞ്ഞ കോവിഡ് കാലഘട്ടത്തിലും 34 മാസം കൊണ്ട് പണി പൂർത്തിയാക്കാൻ കഴിഞ്ഞതിൽ സന്തോഷമുണ്ടെന്നും അവർ വ്യക്തമാക്കി. 1800 ഓളം ഫോർവീലറുകളെ ഉൽക്കൊള്ളാനുള്ള വലിപ്പവും ശേഷിയും കൊണ്ട് യു.എസ്.ടിയുടെ പാർക്കിങ് സംവിധാനം നഗരത്തിന്റെ അഭിമാനസ്തംഭമായി മാറുമെന്നും ശിൽപ്പാ മേനോൻ വിശ്വാസം പ്രകടിപ്പിച്ചു.

ഭാവിയിൽ നാലായിരം കാറുകൾ കൂടി ഉൾക്കൊള്ളാൻ കഴിയുന്ന വിധത്തിൽ അഞ്ച് നിലകൾ കൂടി നിർമ്മിക്കാൻ കമ്പനി പദ്ധതിയിടുന്നുണ്ടെന്നും ഇതോടെ സംസ്ഥാനത്തെ ഏറ്റവും ബൃഹത്തായ പാർക്കിങ് കേന്ദ്രമായി ഇത് മാറുമെന്നും ശിൽപ്പാ മേനോൻ അറിയിച്ചു. കമ്പനിയുടെ സുസ്ഥിര സംരംഭത്തിനും കാർബൺ ന്യൂട്രൽ ആയിരിക്കുക എന്ന ലക്ഷ്യവും മുൻനിർത്തി എം.എൽ.സി.പിയുടെ മുകളിൽ സോളാർ പാനലുകൾ സ്ഥാപിക്കാൻ ആലോചിക്കുന്നതായും അവർ കൂട്ടിച്ചേർത്തു.ഉദ്ഘാടനത്തിന് തയ്യാറായ എം.എൽ.സി.പിയുടെ ഒന്നാം ഘട്ടം 6.18 ലക്ഷം ചതുരശ്രയടി സ്ഥലത്തും, ഓരോ നിലയിലും 1.25 ലക്ഷം ചതുരശ്രയടി സ്ഥലത്തുമാണ് നിർമ്മിച്ചിരിക്കുന്നത്. നാല് നിലകളിലും നാല് എലിവേറ്ററുകളും ആറ് ഫയർ എസ്‌കേപ്പ് എക്‌സിറ്റുകളും സജ്ജീകരിച്ചിട്ടുണ്ട്.

യു.എസ്.ടി കാമ്പസിലെ പുതിയ മൾട്ടി ലവൽ കാർ പാർക്കിങ് സംവിധാനത്തിന്റെ ഏറ്റവും ശ്രദ്ധേയമായ ഒരു വസ്തുത കാലഘട്ടത്തിന് അനുസൃതമായി ഭാവിയിൽ ഉണ്ടാകാൻ ഇടയുള്ള മാറ്റങ്ങൾക്ക് വിധേയമായിട്ടാണ് ഇത് നിർമ്മിച്ചിട്ടുള്ളത് എന്നതാണ്. ഇലക്ട്രിക്ക് വാഹനങ്ങൾക്കായി 75 ചാർജ്ജിങ് ബേയ്കളും സ്ഥാപിച്ചിട്ടുണ്ട്. സുരക്ഷിതവും സുഖകരവുമായ ഡ്രൈവിങ് മനസിൽ കണ്ടാണ് ഡ്രൈവ് വേകൾ നിർമ്മിച്ചിരിക്കുന്നത്. വൺവേ ഡ്രൈവുകൾക്ക് പ്രവേശന കവാടത്തിൽ 9 മീററർ വീതിയും എൻട്രി പോയിന്റിന് ശേഷം 6 മീറ്റർ വീതിയുമുണ്ട്.
പദ്ധതിക്ക് പച്ചിലച്ചാർത്ത് ഒരുക്കിക്കൊണ്ട് യു.എസ്.ടിയിലെ സന്നദ്ധപ്രവർത്തകർ പാർക്കിങ് സംവിധാനത്തിന് ചുറ്റും മിയാവാക്കി വനവും സൃഷ്ടിച്ചിട്ടുണ്ട്. ആയിരത്തോളം ഫലവൃക്ഷങ്ങളും തേക്കുമരങ്ങളും ഇവിടെ വെച്ച് പിടിപ്പിച്ചിട്ടുണ്ട്