ഒമാനിൽ 150 കിലോഗ്രാം മയക്കുമരുന്നുമായി നാല് പ്രവാസികൾ അറസ്റ്റിൽ

മസ്‌കത്ത്: ഒമാനിൽ 150 കിലോഗ്രാം മയക്കുമരുന്നുമായി നാല് പ്രവാസികളെ അറസ്റ്റ് ചെയ്തതായി റോയൽ ഒമാൻ പൊലീസ് അറിയിച്ചു. നോർത്ത് അൽ ബാത്തിന ഗവർണറേറ്റ് പൊലീസാണ് ലഹരി വസ്തുക്കൾ കടത്താനുള്ള ആസൂത്രിത നീക്കം പരാജയപ്പെടുത്തിയത്. പിടിച്ചെടുത്ത മയക്കുമരുന്നുകളുടെ ചിത്രങ്ങളും പൊലീസ് പുറത്തുവിട്ടു.

അൽ ദാഹിറ ഗവർണറേറ്റിലെ ഒരു വീട്ടിൽ അതിക്രമിച്ച് കയറി മോഷണം നടത്തിയ രണ്ട് പ്രവാസികളെയും ഇന്ന് പിടികൂടി. മസ്‌കത്ത്, അൽ ദാഖിലിയ എന്നിവിടങ്ങളിൽ നിന്നുള്ള ക്രിമിനൽ ഇൻവെസ്റ്റിഗേഷൻസ് ഡയറക്ടറേറ്റുകളുടെ സഹകരണത്തോടെ അൽ ദാഹിറ പൊലീസ് കമാൻഡ് നടത്തിയ തെരച്ചിലിലാണ് ഇവർ വലയിലായത്.

വീട്ടിൽ അതിക്രമിച്ച് കയറിയ ഇരുവരും വീട്ടുടമയെ ഭീഷണിപ്പെടുത്തുകയും അദ്ദേഹത്തിന്റെ പഴ്‌സ്, മൊബൈൽ ഫോൺ, കാർ എന്നിവ മോഷ്ടിക്കുകയും ചെയ്തു. പിടിയിലായ പ്രതികൾക്കെതിരെ നിയമ നടപടികൾ സ്വീകരിച്ചുവരികയാണെന്ന് റോയൽ ഒമാൻ പൊലീസ് അറിയിച്ചു.