ഖത്തറിൽ ലോകകപ്പ് സമയത്ത് താമസക്കാർക്ക് യാത്രാ വിലക്കുണ്ടാവില്ലെന്ന് അധികൃതർ

 ദോഹ: ഫുട്‌ബോൾ ലോകകപ്പ് മത്സരങ്ങളുടെ സമയത്ത് ഖത്തറിലെ താമസക്കാർക്ക് യാത്രാ വിലക്കേർപ്പെടുത്തുമെന്ന അഭ്യൂഹങ്ങൾ നിഷേധിച്ച് അധികൃതർ. ഇത്തരത്തിൽ പ്രചരിക്കുന്ന റിപ്പോർട്ടുകൾ അടിസ്ഥാന രഹിതമാണെന്ന് സുപ്രീം കമ്മിറ്റി ഫോർ ഡെലിവറി ആൻഡ് ലെഗസി വക്താവ് ഖാലിദ് അൽ നമ അറിയിച്ചു.

ജുലൈ മാസത്തിന് ശേഷം ഖത്തറിൽ നിന്ന് പുറത്തുപോകരുതെന്നും, പോയാൽ ലോകകപ്പ് കഴിയാതെ പിന്നെ മടങ്ങിവരാനാവില്ലെന്നുമുള്ള നിരവധി അഭ്യൂഹങ്ങൾ പ്രചരിച്ചിരുന്നു. എന്നാൽ ഇക്കാര്യങ്ങളിൽ ഔദ്യോഗിക വിശദീകരണങ്ങളൊന്നും ലഭ്യമല്ലാതിരുന്നതിനാൽ ജനങ്ങൾ ആശങ്കയിലായ സാഹചര്യത്തിലാണ് ഇപ്പോൾ വ്യക്തത വരുത്തിയത്. ഖത്തർ ടെലിവിഷന് നൽകിയ അഭിമുഖത്തിൽ ഖാലിദ് അൽ നമ ഇത്തരം അഭ്യൂഹങ്ങൾ പൂർണമായി തള്ളിക്കളഞ്ഞു.

ലോകകപ്പ് മത്സരങ്ങൾ നടക്കുന്ന സമയത്ത് സ്വദേശികൾക്കും പ്രവാസികൾക്കും രാജ്യത്തേക്ക് വരുന്നതിന് വിലക്കുണ്ടാകുമോ എന്ന ചോദ്യത്തിന്, പ്രവാസികളും സ്വദേശികളും രാജ്യത്തുനിന്ന് പുറത്തുപോകുന്നതിനെയും തിരിച്ചു വരുന്നതിനെയും ലോകകപ്പ് ഒരു തരത്തിലും ബാധിക്കില്ലെന്ന് അദ്ദേഹം പറഞ്ഞു. ലോകകപ്പ് സമയത്ത് അവരും ഇവിടെയുണ്ടാകണമെന്നാണ് ആഗ്രഹം, എന്നാൽ യാത്രാ വിലക്കുകളൊന്നും ഏർപ്പെടുത്തില്ല - അദ്ദേഹം പറഞ്ഞു.