വാഷിങ്ടൻ ഡി സി : യുഎസ് ജനപ്രതിനിധിസഭ സ്പീക്കറും, ഡമോക്രാറ്റിക് പാർട്ടി സീനിയർ ലീഡറുമായ നാൻസി പെലോസിക്ക് കോവിഡ് സ്ഥിരീകരിച്ചു. അമേരിക്കയിൽ കഴിഞ്ഞ രണ്ടു വർഷം കോവിഡ് വ്യാപനം അതിരൂക്ഷമായിരുന്നിട്ടും നാൻസി പെലോസിക്ക് രോഗം ബാധിച്ചിരുന്നില്ല.

കോവിഡ് മാനദണ്ഡങ്ങൾ കർശനമായി പാലിച്ചിരുന്ന ഇവർ വാക്സീനും ബൂസ്റ്റർ ഡോസും സ്വീകരിച്ചിരുന്നു. ബുധനാഴ്ച വൈറ്റ് ഹൗസിൽ അഫോഡബിൾ കെയർ ആക്ടിന്റെ ഏറ്റവും പുതിയ നിയമങ്ങൾ ഉൾകൊള്ളിച്ച് എക്സിക്യൂട്ടീവ് ഉത്തരവ് ബൈഡൻ ഒപ്പുവയ്ക്കുമ്പോൾ, കമല ഹാരിസ്, ഒബാമ തുടങ്ങിയ നിരവധി പ്രമുഖരോടൊത്ത് നാൻസി പെലോസിയും പങ്കെടുത്തിരുന്നു.

ചടങ്ങിൽ പ്രസിഡന്റ് ബൈഡനെയും ഒബാമയേയും നാൻസി പെലോസി ആലിംഗനം ചെയ്യുന്ന ചിത്രങ്ങളും വൈറ്റ് ഹൗസ് പ്രസിദ്ധീകരണത്തിന് നൽകിയിരുന്നു. കഴിഞ്ഞ ആഴ്ചയിൽ നാൻസി പെലോസിയുടെ കോവിഡ് പരിശോധനാ ഫലം നെഗറ്റീവായിരുന്നു.

ബൈഡന്റെ സഹോദരി വലേറി ബൈഡൻ, ബൈഡന്റെ രണ്ട് ക്യാബിനറ്റ് അംഗങ്ങൾ എന്നിവർക്കും ഈ ആഴ്ച കോവിഡ് സ്ഥിരീകരിച്ചിരുന്നു. കോവിഡ് സ്ഥിരീകരിച്ചെങ്കിലും നാൻസി പെലോസിക്ക് കാര്യമായ രോഗലക്ഷണങ്ങൾ പ്രകടമല്ല.

 

നാൻസി പെലോസി