വാഷിങ്ടൺ ഡിസി: റഷ്യ-യുക്രെയ്ൻ യുദ്ധം അനിശ്ചിതമായി തുടരവെ പാട്രിയറ്റ് മിസൈൽ സിസ്റ്റം സ്ലൊവാക്യയിലേക്ക് അയയ്ക്കുന്നതിന് യുഎസ് തീരുമാനിച്ചതായി ഡിഫൻസ് സെക്രട്ടറി ലോയ്ഡ് ഓസ്റ്റിൻ അറിയിച്ചു.
മധ്യ യൂറോപ്പിലെ നാറ്റോ അംഗ രാഷ്ട്രങ്ങളുടെ സുരക്ഷ ഉറപ്പുവരുത്തുന്നതിന്റെ ഭാഗമായി യുക്രെയിനിന്റെ പടിഞ്ഞാറെ അതിർത്തിയിലുള്ള സ്ലൊവാക്യയിലേക്ക് അയയ്ക്കുന്ന പാട്രിയറ്റ് മിസൈൽ സിസ്റ്റത്തിന് അതിർത്തിയിലേക്കു വരുന്ന മിസൈലുകൾ തകർക്കുന്നതിനുള്ള ശേഷിയുണ്ട്. യുഎസ് സൈനികർക്കായിരിക്കും ഇതിന്റെ ചുമതല എന്നും ഡിഫൻസ് സെക്രട്ടറി പറഞ്ഞു. എത്രനാൾ യുഎസ് ട്രൂപ്പ് ഇവിടെ ഉണ്ടായിരിക്കുമെന്ന് തീരുമാനിച്ചിട്ടില്ലെന്നും മറ്റൊരു ചോദ്യത്തിനുത്തരമായി ലോയ്ഡ് ഓസ്റ്റിൽ പറഞ്ഞു.
എസ് 300 എയർ ഡിഫൻസ് സിസ്റ്റം റഷ്യക്കെതിരെ പ്രയോഗിക്കുന്നതിന് യുക്രെയിനു നൽകണമെന്ന് സ്ലൊവാക്യ പ്രഖ്യാപിച്ചതിനു തൊട്ടു പിന്നാലെയാണ് അമേരിക്കൻ സ്റ്റേറ്റ് സെക്രട്ടറിയുടെ അറിയിപ്പു പുറത്തുവന്നത്.
റഷ്യൻ സൈന്യത്തെ ധീരതോടെ പരമാവധി ചെറുത്തു നിൽക്കാൻ യുക്രെയ്ൻ സേനയ്ക്കു പിന്തുണ നൽകുക എന്നതാണ് തന്റെ രാജ്യം ചെയ്യുന്നതെന്ന് സ്ലൊവാക്യൻ പ്രധാനമന്ത്രി എഡ്വവേർഡ് ഹെഗർ പറഞ്ഞു.
