ഡാലസ്: ഡാലസിൽ ഭർതൃമാതാവിനെ വെടിവച്ചു കൊന്ന യുവതി അറസ്റ്റിൽ. റിച്ചാർഡ്സണിലെ റണ്ണർ റോഡിലുള്ള സ്റ്റാർബക്സിലാണു സംഭവം നടന്നത്. അറസ്റ്റ് റിച്ചാർഡ്സൺ പൊലിസ് സ്ഥിരീകരിച്ചു. ഏപ്രിൽ 18 തിങ്കളാഴ്ച രാത്രി ഏഴു മണിയോടെയായിരുന്നു സംഭവം.
കൊച്ചുമകളുടെ കസ്റ്റഡിയുമായി ബന്ധപ്പെട്ടു ട്രിനീഷ ഒക്ടാവിൽ ട്രിന വാട്ടുസും (23) ഭർത്തൃമാതാവ് കെന്റോറിയൊ നിക്കോൾ എഡ്വേർഡ്സും തമ്മിൽ തർക്കം നിലനിന്നിരുന്നു. എഡ്വേഡിന്റെ കൂടെയുണ്ടായിരുന്ന കുട്ടിയെ കാണണമെന്നു വാട്ട്സ് ആവശ്യപ്പെട്ടു. സ്റ്റാർബക്സിൽ കണ്ടുമുട്ടാം എന്നു സമ്മതിക്കുകയും ചെയ്തു. കുട്ടിയുമായി സ്റ്റാർബക്സിൽ എത്തിയ എഡ്വേർഡിനെ പെട്ടെന്നു യാതൊരു പ്രകോപനവുമില്ലാതെ ട്രിന വെടിവയ്ക്കുകയായിരുന്നു എന്നാണു ദൃക്സാക്ഷികൾ പറയുന്നത്.
വെടിയേറ്റു വീണ എഡ്വേഡിനു പ്രഥമ ചികിത്സ നൽകി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. റിവോൾവർ ഉപയോഗിച്ചു രണ്ടുതവണ വെടിയുതിർത്ത ശേഷം കുട്ടിയുമായി രക്ഷപ്പെടാൻ ശ്രമിച്ച വാട്ട്സിനെ പൊലിസ് അറസ്റ്റ് ചെയ്തു റിച്ചാർഡ്സൺ സിറ്റി ജയിലിലടച്ചു. ഇവർക്ക് ഒരു മില്യൺ ഡോളറിന്റെ ജാമ്യം അനുവദിച്ചിട്ടുണ്ട്.
വളരെ ശാന്തമായ റിച്ചാർഡ്സൺ സിറ്റിയിൽ ഈ വർഷം ആദ്യം നടക്കുന്ന കൊലപാതകമാണിതെന്നും ഇതേക്കുറിച്ചു കൂടുതൽ വിവരങ്ങൾ ലഭിക്കുന്നവർ റിച്ചാർഡ്സൺ പൊലിസ് ഡിപ്പാർട്ട്മെന്റിനെ 9727444800 നമ്പറിൽ വിളിച്ചു അറിക്കണമെന്നും അഭ്യർത്ഥിച്ചിട്ടുണ്ട്.
