ജിദ്ദ: റുവൈസ് ഏരിയ കെഎംസിസി പ്രവർത്തകർക്കായി ഇഫ്താർ സംഗമം നടത്തി. റുവൈസ് ഹോട്ടൽ ഓഡിറ്റോറിയത്തിൽ വെച്ച് നടന്ന പരിപാടി റുവൈസ് ഏരിയ കെഎംസിസി വൈസ് പ്രസിഡന്റ് മുസ്തഫ ചെമ്പൻ ഉദ്ഘാടനം ചെയ്തു. മുൻ വർഷങ്ങളിൽ ജീവ കാരുണ്യ പ്രവർത്തനം ഉൾപ്പെടെ നിരവധി മാതൃക പ്രവർത്തനങ്ങൾ റുവൈസ് ഏരിയ കെഎംസിസി നടത്തിയിട്ടുണ്ടെന്ന് അദ്ദേഹം പറഞ്ഞു.
പരിപാടിയിൽ റുവൈസ് ഏരിയ കെഎംസിസി ആക്ടിങ് പ്രസിഡന്റ് സയ്യിദ് മുഹ്ദാർ തങ്ങൾ കാളികാവ് അധ്യക്ഷത വഹിച്ചു. കെഎംസിസി സെൻട്രൽ കമ്മിറ്റിയുടെ സി. എച്ച് സെന്റർ, ശിഹാബ് തങ്ങൾ റിലീഫ് സെൽ ക്യാമ്പയിൻ വിജയിപ്പിക്കണമെന്ന് അദ്ദേഹം പറഞ്ഞു.
ഹൈദർ ദാരിമി തുവ്വൂർ റമദാൻ സന്ദേശം നൽകി. സൽകർമ്മങ്ങൾ ചെയ്തും പാപമോചനം തേടിയും സൃഷ്ടാവിനോട് കൂടുതൽ അടുക്കാൻ വിശ്വാസികൾ മുന്നോട്ട് വരണമെന്ന് അദ്ദേഹം ഉദ്‌ബോധിപ്പിച്ചു. കെഎംസിസി നടത്തുന്ന ജീവ കാരുണ്യ പ്രവർത്തനങ്ങളിൽ എല്ലാവരും പങ്കാളികളാവണമെന്നും അദ്ദേഹം ആവശ്യപ്പെട്ടു.
ആക്ടിങ് സെക്രട്ടറി മുഹമ്മദ് ഫിറോസ് കൊളത്തൂർ സ്വാഗതവും ട്രഷറർ കെ. എൻ. എ ലത്തീഫ് കൊണ്ടോട്ടി നന്ദിയും പറഞ്ഞു. റുവൈസ് ഏരിയ കെഎംസിസി ഭാരവാഹികളായ മുസ്തഫ ആനക്കയം, ശരീഫ് മുസ്ലിയാരങ്ങാടി, മുഹമ്മദലി പന്താരങ്ങാടി, സലീം കരിപ്പോൾ തുടങ്ങിയവർ പരിപാടിക്ക് നേതൃത്വം നൽകി.
പെരുന്നാളാഘോഷത്തിന്റെ ഭാഗമായി റുവൈസ് കെഎംസിസി തായിഫ് ടൂർ സംഘടിപ്പിക്കുമെന്ന് ഭാരവാഹികൾ അറിയിച്ചു.
