സ്വകാര്യ വസ്തുവിലെ മരങ്ങൾ നിയമ വിരുദ്ധമായി മുറിച്ച സംഭവം; 25000 രൂപ നഷ്ടപരിഹാരം നൽകണമെന്ന് മനുഷ്യാവകാശ കമ്മീഷൻ
തൊടുപുഴ: സ്വകാര്യ വ്യക്തിയുടെ വസ്തുവിൽ നിന്ന മരങ്ങൾ ഉടമക്ക് നോട്ടീസ് നൽകാതെയും കോടതി തീർപ്പ് വരെ കാത്തു നിൽക്കാതെയും കരിമണ്ണൂർ പഞ്ചായത്ത് സെക്രട്ടറി മനഃപൂർവ്വം മുറിച്ചു മാറ്റിയെന്ന പരാതിയിൽ വസ്തു ഉടമക്ക് 25000 രൂപ നഷ്ടപരിഹാരം നൽകണമെന്ന്
സംസ്ഥാന മനുഷ്യാവകാശ കമ്മീഷൻ
തദ്ദേശ സ്വയംഭരണ വകുപ്പ് പ്രിൻസിപ്പൽ സെക്രട്ടറി ഉടൻ നഷ്ടപരിഹാരം നൽകണമെന്നും അന്വേഷണം പൂർത്തിയാക്കിയ ശേഷം കരിമണ്ണൂർ മുൻ പഞ്ചായത്ത് സെക്രട്ടറി സാജു ജോസഫിൽ നിന്നും തുക ഈടാക്കാവുന്നതാണെന്നും കമ്മീഷൻ അധ്യക്ഷൻ ജസ്റ്റിസ് ആന്റണി ഡൊമിനിക്ക് ഉത്തരവിൽ പറഞ്ഞു.
നിയമ വിരുദ്ധമായി മരങ്ങൾ മുറിച്ച മുൻ പഞ്ചായത്ത് സെക്രട്ടറിക്കെതിരെ തദ്ദേശസ്വയംഭരണ വകുപ്പ് പ്രിൻസിപ്പൽ സെക്രട്ടറിയോ ഇല്ലെങ്കിൽ നിയമപ്രകാരം അധികാരമുള്ള ഉദ്യോഗസ്ഥരോ വകുപ്പുതല അന്വേഷണം നടത്തി നിയമപരമായ നടപടി സ്വീകരിക്കണമെന്നും ഉത്തരവിൽ പറയുന്നു.വസ്തു ഉടമയും പരാതിക്കാരിയുമായ കരിമണ്ണൂർ നെയ്യാശേരി സ്വദേശിനി ആഗ്‌നസ് ഫ്രാൻസിസിന് കൂടുതൽ നഷ്ടം ഉണ്ടായിട്ടുണ്ടെങ്കിൽ അത് ഉത്തരവാദപ്പെട്ടവരിൽ നിന്നും കോടതി മുഖാന്തിരം ഈടാക്കാമെന്നും ഉത്തരവിൽ പറഞ്ഞു.
വിഷയത്തിൽ അന്നത്തെ ഇടുക്കി പഞ്ചായത്ത് ഡപ്യൂട്ടി ഡയറക്ടറുടെ ഇടപെടൽ അനധികൃതമായിരുന്നോ എന്നതിനെ കുറിച്ച് അന്വേഷിക്കണമെന്നും ഉത്തരവിൽ പറഞ്ഞു. അനധികൃത ഇടപെടൽ ഉണ്ടായിട്ടുണ്ടെങ്കിൽ ഈ ഉദ്യോഗസ്ഥനെതിരെയും വകുപ്പുതല നടപടി സ്വീകരിക്കണമെന്ന് കമ്മീഷൻ തദ്ദേശ സ്വയംഭരണ വകുപ്പ് പ്രിൻസിപ്പൽ സെക്രട്ടറിക്ക് ഉത്തരവ് നൽകി. ഉത്തരവിന്റെ അടിസ്ഥാനത്തിൽ സ്വീകരിച്ച നടപടികൾ മെയ് 31 നകം തദ്ദേശ സ്വയംഭരണ വകുപ്പ് പ്രിൻസിപ്പൽ സെക്രട്ടറി കമ്മീഷനെ രേഖാമൂലം അറിയിക്കണം. കേസ് ജൂൺ 6 ന് പരിഗണിക്കും.
